Екібастұздағы ЖЭС-те тағы апат болды

Екібастұз Жылу электр орталығында тағы апат болды. Бұл туралы «ЕкібастұзЖылуЭнерго» ЖШС-на сілтеме жасай отырып El.kz ақпарат агенттігі хабарлайды.

10 желтоқсан, сағат 01.10-да Екібастұз ЖЭС-тің күл шығаратын құбырында ақау анықталды. Сағат 05.30-да зақым жойылды.

Ақау салдарынан су жылыту қазандықтарының екінші цехінде багер сорғысын су басып қалды. Резервте болған екі энергетикалық қазандық агрегаты іске қосылды.

Екібастұз ЖЭО мен Екібастұз қалалық Төтенше жағдайлар басқармасының күшімен суды сорып шығару жұмыстары жүргізіліп жатыр. Онымен қоса, станцияның багер сорғысын ауыстырып, одан әрі іске қосу үшін резервті қозғалтқыш дайындалды, - делінген хабарламада.

Мәліметке сүйенсек, қазіргі уақытта станцияда 7 қазандық агрегаты істеп тұр (Nº 5, 6, 7, 9, 11, 13, 14), оның ішінде су жылыту цехіндегі 3 қазандық уақытша мазутпен жағылып жатыр. Ал жақын уақытта багер сорғысын іске қосу бойынша барлық жұмыстар аяқталатын болады.

Кейін су жылыту қазандықтары кестеге сәйкес көмірге ауыстырылып, стандартты жұмысы қалпына келтіріледі, - деді компаниядан.