Екібастұзда 777 жүргізуші әкімшілік жауапкершілікке тартылды

Екібастұзда соңғы жеті айда 777 жүргізуші әкімшілік жауапкершілікке тартылған, деп хабарлайды El.kz ақпарат агенттігі. 

Әрбір автокөлік жүргізушісі қауіпсіздік белбеуі жол-көлік оқиғаларына көп көмектесетінін біледі. Автокөлікке қауіпсіздік белдігін тағу – жүргізуші мен жолаушылардың өмірін қорғаудың маңызды әрекеттерінің бірі. Белдік ауыр жарақаттардың алдын алуға көмектеседі және апаттар кезінде өлім қаупін азайтады.

Сонымен қатар апат немесе қатты тежеу жағдайында бекітілген қауіпсіздік белдігі жүргізуші мен жолаушыларды орнында ұстайды, бұл көлік құралының ішкі элементтерімен соқтығысуға немесе терезеден көліктен лақтыруға жол бермейді. Алайда оны іс жүзінде бәрі бірдей қолдана бермейді. Жүргізушілер мен жолаушылар бұл тәртіпті сақтамаудың түрлі себептерін айтады.

Мәселен, соңғы жеті айда ҚР ӘҚБтК-нің 593-бабы 2-бөлігін (Жол жүрiсi қағидаларында көзделген жолаушыларды және жүктердi тасымалдау, қауiпсiздiк белдіктерiн немесе мотошлемдердi пайдалану жөніндегі талаптарды сақтамау) бұзғаны үшін 777 жүргізуші әкімшілік жауапкершілікке тартылған. Қауіпсіздік белдіктерін немесе мотошлемдерді пайдалану ережелерін сақтамағаны үшін 5 АЕК мөлшерінде айыппұл салынған, – деп атап өтті Екібастұз қаласы ПБ ЖПҚБ патрульдік полиция ротасының командирі Фаруз Күсембеков.