Денедегі жағымсыз иісті күшейтетін және азайтатын тағамдар

Көпшіліктің пікірінше, денеден шығатын жағымсыз иіс тершеңдік, жеке бас гигиенасының сақталмауы немесе денсаулықтағы проблемалардан туындайды. Бұл тұжырым ішінара дұрыс, алайда соңғы зерттеулер тамақтану рационы да иістің пайда болуына тікелей әсер ететінін көрсетіп отыр, деп хабарлайды El.kz  интернет порталы.

Тер — 98%-ы су және 2%-ы мырыш, мыс, темір, никель, кадмий сияқты элементтерден тұратын сұйықтық. Бірақ ылғалды ортада бактериялар белсенді түрде көбейіп, олардың тіршілік әрекеті нәтижесінде жағымсыз иіс түзіледі. Егер терлеген соң бірден душ қабылдау мүмкіндігі болмаса, бактериялар саны артып, иіс те күшейе түседі.

Жағымсыз иісті күшейтетін тағамдар:

• Алкоголь, глутамат натрийі мен кофеин — тершеңдікті арттыратын негізгі факторлар;
• Жануар тектес ақуыз — ағзада баяу қорытылады, нәтижесінде ішекте ыдырау өнімдері қанға, сосын терге өтеді, бактериялармен әрекеттесіп, иісті күшейтеді;
• Кейбір көкөністер — мысалы, қояншөп, брокколи, гүлді қырыққабат. Мамандар ас мәзірінде бұларды алмастыруды ұсынады: қояншөпті – балдыркөкпен, асқабақты – апельсинмен, ал брокколи мен гүлді қырыққабатты – алмамен;
• Ащы тағамдар мен дәмдеуіштер (чили, карри, зире) — капсаицин және басқа химиялық қосылыстар миды шатастырып, ағзаны артық тер бөлуге итермелейді;
• Қызыл балық пен теңіз балығы (тунец) — құрамындағы холин (B4 дәрумені) кей адамдарда дене иісінің «балық» иісіне ұқсап кетуіне әкеледі.

Иісті азайтатын пайдалы тағамдар мен сусындар:

• Жасыл жапырақты көкөністер (шпинат, руккола, орамжапырақ) — табиғи дезодорант рөлін атқаратын хлорофилге бай. Ағзадағы pH деңгейін тұрақтандырып, ауыз қуысының құрғауынан сақтайды, демек жағымсыз иісті болдырмайды;
• Аскөк — хлорофилге бай, халық медицинасында ауыз иісін жоюға қолданылған;
• Жалбыз — тыныштандыратын әсер береді, тер бездеріне әсер ететін жүйке импульстарын әлсіретеді;
• Бозжусан (розмарин) — құрамында мырыш, хлорофил мен ментол бар, бактериялар өсуін тежейді;
• Су — ең қарапайым әрі тиімді шешім. Су ағзаны іштен тазартып, токсиндер мен иістерден арылтады;
• Шөп шайлары (шалфей – сәлбен, түймедақ, мелисса – лимонжапырақ) мен қызылшай (иван-чай) — жағымды иіс қалыптастыруда пайдалы;
• Жасыл шай — органикалық қышқылдар мен таниндер арқылы тершеңдікті азайтып, бактериялардың көбеюіне жол бермейді.

Бұған дейін ыстық күнде қандай тағамдар жеуге болмайтынын және сусызданудан қалай сақтану керектігін жазған едік.