Ә. Смайылов: Мемлекеттік органдардың бірыңғай ақпараттық-талдау ортасы құрылады

Мемлекеттік органдардың бірыңғай ақпараттық-талдау ортасы құрылады. Бұл жөнінде бүгін ҚР Статистика агенттігінің кеңейтілген алқа мәжілісінде ведомство басшысы Әлихан Смайылов мәлім етті, деп хабарлайды BNews.kz тілшісі.

«ҚР Президенті Әкімшілігі басшысының тапсырмасына сәйкес, өткен жылы мемлекеттік органдардың бірыңғай ақпараттық-талдау ортасын жүзеге асыру бойынша жұмыстар басталды. Бұл жүйенің мақсаты Президент Әкімшілігіне мемлекеттік органдардың статистикалық және әкімшілік ақпараттарды ұсыну процесін оңтайландыру және автоматтандыру болып табылады. Мұнымен қатар ведомствоаралық мәліметтердің алмасуы да автоматтандырылады», - деп атап өтті агенттік төрағасы.

Бұл мақсатта бүгінгі күні жұмыс тобы құрылып, іс-шаралар жоспарының жобасы әзірленген.

Естеріңізге сала кетейік, Астанада ҚР Премьер-Министрінің орынбасары Ербол Орынбаевтың қатысуымен ҚР Статистика агенттігінің кеңейтілген алқа мәжілісі өтіп жатыр. Жиында агенттіктің өткен жылы атқарған жұмысы қорытындыланып, 2013 жылдың негізгі мақсат-міндеттері белгіленеді.

Айымгүл Әбілева