Спорт – достықты өрістетіп, дипломатияны нығайтады

«Барыс» спорт клубында шайбалы хоккейден Астана қаласының әкімдігі мен Канаданың Қазақстандағы Елшілігі командалары  арасында жолдастық кездесу өтті. Аталған кездесудің мақсаты – бұқаралық спортты дамытып, екі ел арасындағы ынтымақтастық қарым-қатынасты нығайту, сөйтіп,  шайбалы хоккейге деген қызығушылықты арттыру.

Айталап Қорғамбаев, Астана қаласы Туризм, дене тәрбиесі және спорт басқармасының бастығы:

Өткен жылы Канада мен Қазақстанның арасындағы дипломатиялық қарым-қатынасты нығайту мақсатында алғашқы ойын өткен болатын. Содан кейін Канада елшісі Стивен Миллар мырзаның ұсынысымен осы дәстүрді жалғастырып, жыл сайын ұйымдастыратын болдық. Сонымен қатар жастарды спортқа бейімдеп, Канада мен Қазақстан спортшылары арасындағы достықты нығайтып, спорт саласын ары қарай дамытуды мақсат етеміз.

Астана қаласында өткен ойынның 5-минутында алғашқы шайбаны Денис Тарарин салып, алаң иелерін алға шығарды. Ал, Канада Елшілігінің хоккейшісі Райан Берг тек 12 минут өткеннен кейін ғана есепті теңестірді. 

Асқар Әбенов, «Астана» командасының қорғаушысы:

Ойын дипломатиялық түрде өтіп жатқанымен, өте қызықты. Оның үстіне, биыл екінші рет кездесіп отырмын. Ойыншыларды жақсы білемін.

Кездесу соңына дейін таласты тартысқа толы болды. Үш кезеңде де екі команда бір-біріне есе жібермей, тепе-тең келді. Есеп 8:8. Нәтижесінде, хоккейшілер ойынды буллитке жеткізді. Сонымен, астаналық команда тағы да басым түсіп, Владимир Суслов, Дмитрий Лоханиндер 10:9 есебімен команданы алға шығарды.

 Астана қаласының ресми сайты astana.kz