БҚО-да онкологиялық ауруға шалдыққан 58 науқастың құқығы бұзылған

Батыс Қазақстан облысында қатерлі ісікке шалдыққан 58 науқастың құқығы бұзылған, деп хабарлайды El.kz ақпарат агенттігі. 

Облыс прокуратурасы медициналық ұйымдардың онкологиялық ауруға шалдыққан азаматтардың құқықтарын сақтау мәселелеріне талдау жасады. Нәтижесінде дәрігерлердің медициналық-әлеуметтік сараптама жүргізу ережелерінің талаптарын сақтамағаны анықталған.

Атап айтқанда, қатерлі ісікпен ауыратын және дене функцияларының тұрақты бұзылуы бар 58 азаматтың мүгедектігі болмаған. Белгіленген талаптарға қайшы медицина қызметкерлері оларды медициналық-әлеуметтік сараптамаға жібермей, азаматтардың конституциялық құқықтарының бұзылуына әкеп соқты.

Қазіргі уақытта онкологиялық науқастарды сараптамаға жіберу үшін прокурорлық қадағалау актісі бойынша материалдар дайындалуда. Бұзушылықтар үшін онкологиялық диспансердің кінәлі қызметкерлері тәртіптік жауапкершілікке тартылды. Азаматтардың құқықтарын сақтау мәселелері прокуратураның тұрақты бақылауында,-делінген прокуратура мәліметінде.