Бір жыл бойы табылмаған туристі жасанды интеллект екі күнде тапты

Италиядағы Монте-Визо тауында бір жылға жуық уақыт бойы табылмай келген туристің сүйегі жасанды интеллекттің көмегімен небәрі екі күн ішінде анықталды, деп хабарлайды El.kz интернет порталы.

AI технологиясы іздестіру-құтқару жұмыстарында серпіліс жасап, мыңдаған суретті сараптап, жоғалған адамды табуға жол ашты.

Бұл туралы Le Figaro басылымы жазды.

Итальяндық тауда құтқарушылар жоғалған туристі табу үшін күтпеген, бірақ аса тиімді құрал – жасанды интеллектке жүгінді. 29 шілдеде жоғалған адамның телефонынан анықталған ұялы байланыс сигналы бойынша белгіленген аумақты өрт сөндіру қызметінің тікұшағы мен бірнеше дрон суретке түсірді.

Жалпы 183 гектар тау жотасы қамтылып, 2 600 фотосурет жасалды. Кейін бұл суреттер арнайы бағдарламалық жүйеге жүктеліп, жасанды интеллект кез келген аномалияны анықтау үшін талдаудан өткізді.

Суреттерді өңдеу кезінде нейрожелі тексеру қажет үш нысан анықтады. Сол нысандардың бірі – табиғи ландшафтқа жатпайтын қызыл түсті қорғаныс бас киімі – негізгі белгі ретінде танылды. AI мұны толық емес екі жұмыс күнінде анықтады. Дрон операторлары аталған күдікті орындардың әрқайсысын тексерді.

Нәтижесінде туристің сүйегі Монте-Визо тауының солтүстік жағында, теңіз деңгейінен шамамен 3 150 метр биіктікте табылды.