Бесқарағай ауданында «Ауыл – ел бесігі» жобасы қалай жүзеге асырылып жатыр

Абай облысының әкімдігі «Ауыл ел бесігі» жобасы бойынша Бесқарағай ауданында атқарылған жұмыстар бойынша қорытынды жасады, деп хабарлайды El.kz ақпараттық агенттігі ТЖМ баспасөз қызметіне сілтеме жасап.

Бұл жобаның негізгі мақсаты ауылдар мен елді мекендердің тұрақты дамуын қамтамасыз ету, абаттандыру және тұрғындардың өмір сапасын жақсарту болып табылады.

Бесқарағай ауданында «Ауыл-ел бесігі» жобасы шеңберінде 2022 жылы 14 жоба жүзеге асырылды.

Бесқарағай ауылындағы Әуезов, Жабаев, Западная, Мир, Тәуелсіздік көшелері орташа жөндеуден өтсе, Желтоқсан, Ломоносов, Рысқұлбеков, Стройтельная көшелеріне жарық тартылып, шамдар орнатылды. Бегендегі Абай, Әуезов көшелері жөнделсе, Малая Владимировка ауылындағы көшелер орташа жөнделіп, жарықтандырылды.

2023 жылға арналған «Ауыл – ел бесігі» жобасы шеңберінде ауылдық елді мекендерде әлеуметтік және инженерлік инфрақұрылым бойынша 7 жобаны іске асыру көзделген. Жолдарды жөндеуге, көшелерді жарықтандыруға және Канонерка ауылындағы клубтың шатырын толықтай жөндеу жоспарланып отыр.