Бектенов инклюзивті орта құруға баса назар аударуды тапсырды

Ақтөбе облысының әкімдігі мүгедектігі бар жандарға арналған оңалту орталығы құрылысын аяқтау үшін жұмыс қарқынын күшейтуі қажет. Бұл туралы премьер-министр Олжас Бектенов айтты, деп хабарлайды El.kz ақпарат агенттігі.

Бектенов бұдан бөлек те бірқатар тапсырма берді:

Былтыр Абай, Жамбыл және Түркістан облыстарында оңалту орталықтары ашылды. Мұндай орталықтарды Ақмола, Атырау, Жетісу облыстары мен Шымкент қаласында салу жоспарланып отыр. Олардың барлығы мерзімінде аяқталуы тиіс;

Денсаулық сақтау және Еңбек және халықты әлеуметтік қорғау министрліктері медициналық-әлеуметтік сараптама сапасын одан әрі арттыру мақсатында ақпараттық жүйелерді толық интеграциялауы қажет;

Өнеркәсіп және құрылыс министрлігі - мердігерлік ұйымдар жауапкершілігі мен құрылыс сапасын арттыру, инклюзивті орта құру жөніндегі нормалардың сақталуын бақылауды күшейту үшін қолданыстағы стандарттарды қайта қарауы тиіс;

Денсаулық сақтау министрлігі мүгедектіктің алдын алу, сырқатты ерте диагностикалау және ерте ем көрсету жұмыстарын сапалы тұрғыда жақсартсын;

Оқу-ағарту және Ғылым және жоғары білім министрліктері мүгедектігі бар балалармен жұмыс істейтін педагогтер даярлауды түбегейлі жақсарту қажет;

Еңбек және халықты әлеуметтік қорғау министрлігі мемлекет басшысының тапсырмасы бойынша әзірленетін инклюзивті саясат жөніндегі тұжырымдама жобасын Үкіметке 15 қарашаға дейін енгізсін.