Бас прокуратура мемлекетке 85,1 млн теңге қайтарды

Шымкент қаласында мемлекет мүддесін қорғау бағытында жүргізілген прокурорлық қадағалау нәтижесінде жалпы сомасы 85,1 миллион теңге көлемінде әкімшілік айыппұл салынып, оның 41,6 миллион теңгесі өндіріліп алынды, деп хабарлайды El.kz ақпарат агенттігі.

Бұл шаралар мемлекет кірісін заңсыз жолмен азайтқысы келген салық төлеушілерге қатысты қолданылды. Атап айтқанда, Тұран ауданының прокуратурасы жүргізген мониторинг барысында мемлекеттік кірістер басқармасы тарапынан жалпы құны 709,5 миллион теңге болатын жалған шот-фактуралар жазып берген бес салық төлеушіге қатысты әкімшілік істердің заңсыз түрде тоқтатылғаны анықталды.

Прокуратура қабылдаған шаралар нәтижесінде бұл істер қайта қаралып, Қазақстан Республикасының Әкімшілік құқық бұзушылық туралы кодексінің 280-бабына сәйкес шешім қабылданды. Осылайша, мемлекет мүддесі қорғалып, бюджетке елеулі мөлшерде қаржы қайтарылды.