Балалардың құқықтарын қорғау комитеті қандай жұмыс атқарып жатыр?

Бұл туралы Балалардың құқықтарын қорғау комитетінің төрағасы Насымжан Оспанова айтып берді, деп хабарлайды El.kz ақпарат агенттігі. 

Ол берген ақпаратқа сәйкес, 2023 жылғы 31 тамызда Балаларды зорлық-зомбылықтан қорғау, суицидтің алдын алу жөніндегі 2023-2025 жылдарға арналған кешенді жоспар қабылданды.

Кешенді жоспар 3 бөлімнен тұрады, онда 53 іс-шара қарастырылған. Кешенді жоспарды іске асыру тиімділігін бағалау 9 нысаналы индикатор негізінде жүзеге асырылатын болады. «Педагог» кәсіптік стандарты қабылданды, оның шеңберінде педагог-психолог және әлеуметтік педагог мамандығының карточкасын әзірлеу көзделген, бұл осы мамандарды кәсіби даярлауға қойылатын талаптарды айқындауға мүмкіндік берді. Орта білім беру ұйымдарындағы психологиялық қызметтің жаңа жұмыс істеу қағидалары бекітілді. Орта білім беру ұйымының психологиялық қызметінің жұмыс істеу қағидалары психологиялық қызмет құрамына кіретін мамандардың жұмысын жүйелеуге және нақтылауға, оқу орны әкімшілігінің жауапкершілігін арттыруға мүмкіндік берді. Педагог-психологтар жүргізу үшін міндетті құжаттардың тізбесі қысқартылды, - деді комитет төрағасы.

8 өңірде психологиялық қолдау орталықтары құрылды: Ақмола, Қостанай, Ақтөбе, Павлодар, Қарағанды, Батыс Қазақстан облыстары, Алматы, Астана қалалары.