«Әйелдер ЖИ сервистерін ерлерге қарағанда жиірек қолданады». ҚСЗИ зерттеуінің нәтижесі

Қазақстандықтардың жартысынан астамы – 51,1% жасанды интеллект негізіндегі ChatGPT, Google Gemini, Midjourney және басқа да цифрлық сервистерді қолданады, деп хабарлайды El.kz интернет порталы.

 Бұл деректер ҚР Президенті жанындағы Қазақстанның стратегиялық зерттеулер институтының (ҚСЗИ) 2025 жылғы әлеуметтанулық сауалнамасы нәтижесінде анықталды.

Жастар – ЖИ технологияларын ең белсенді қолданушылар

Сауалнама бойынша жасанды интеллектті ең жиі пайдаланатын топ – жастар:

• 18-29 жас: 76,2%
• 30-45 жас: 57,1%
• 46-60 жас: 37,5%
• 61 жастан асқандар: 16,6%

Жас ұлғайған сайын жаңа технологияларға жүгіну деңгейі айтарлықтай төмендейтіні байқалады.

Қандай мақсатта қолданады?

Жастар ЖИ құралдарын көбіне:

• оқу және өзін-өзі дамыту үшін – 48,7%;
• мәтіндермен жұмыс істеу үшін – 44,2% қолданады.

Орта жастағы топтың сұраныстары да осы бағыттармен сәйкес келеді.
Ал 61 жастан асқан азаматтардың 40,8%-ы жасанды интеллектті ең алдымен ақпарат іздеу құралы ретінде пайдаланады.

Сауалнамада гендерлік ерекшелік те анық байқалды:

• әйелдер ЖИ сервистерін ерлерге қарағанда жиірек қолданады (54,6% vs 46,6%);
• қала тұрғындары ауылдық жерлерге қарағанда белсендірек (53,2% vs 47,9%).

Бұл айырмашылық көбіне қалалардағы цифрлық инфрақұрылымның кең қолжетімділігімен байланысты.

ЖИ қолдану деңгейіне білім факторы айтарлықтай ықпал етеді.

• жоғары білімді респонденттердің 64,2%-ы,
• ал орта білімді азаматтардың 37,7%-ы цифрлық құралдарды қолданатынын айтқан.

Айырмашылық 1,7 есеге жуық. Бұл жаңа технологияларды меңгеруде білім мен дайындықтың шешуші рөл атқаратынын көрсетеді. ҚСЗИ тапсырысымен жүргізілген әлеуметтанулық зерттеу 2025 жылғы 3 қазан мен 5 қараша аралығын қамтыды.
Іріктеме көлемі – 8000 респондент.
Сауалнамаға 17 өңір мен Астана, Алматы және Шымкент қалаларының 18 жастан асқан тұрғындары қатысты.