Ай бетіне 5G баламалы Wi-Fi желісі бар ғылыми обсерватория жеткізіледі

Ресей 2037 жылы Халықаралық Ай ғылыми станциясына (МЛНС) тәулік бойы жұмыс істейтін алғашқы ғылыми обсерваторияны жеткізуді жоспарлап отыр, деп хабарлайды El.kz интернет порталы.

Орталық машина жасау ғылыми-зерттеу институтының «Негізгі және ғылыми-қолданбалы зерттеулердің ғарыштық жүйелері» бөлімінің басшысы Константин Райкуновтың айтуынша, жаңа обсерватория — Айдағы алғашқы энергия тұтынушысы болмақ. Оның басты ерекшелігі — 5G технологиясына ұқсас Wi-Fi жүйесінің орнатылуы.

Бұл жүйе Ай бетінде үлкен аумаққа тарайтын автоматты ғылыми станцияларды байланыстырып, олардан жиналған мәліметті жинауға мүмкіндік береді, — деді Райкунов.

Оның айтуынша, аталмыш байланыс жүйесі арқылы автоматты станциялардан Айдың Жер магнитосферасына кіру және шығу процестері, сондай-ақ геологиялық, сейсмикалық және инерциялық құбылыстар туралы деректер жиналмақ.

Барлық ақпарат Wi-Fi аналогы арқылы Айдағы обсерваторияға жіберіледі. Онда мәліметтер арнайы сақтау құрылғыларына жазылып, қуатты борттық ретрансляциялық кешен көмегімен Жерге — Ресей ғылым академиясына жолданады, — деп түсіндірді ғалым.

МЛНС жобасы туралы

Халықаралық Ай ғылыми станциясы — Ресей мен Қытайдың бірлескен ауқымды жобасы. Оның құрамына төмендегідей негізгі жүйелер кіреді:

• Жер мен Ай арасындағы көлік жүйесі;

• Ай бетінде ұзақ мерзімді жұмысқа арналған қосалқы инфрақұрылым;

• Айдың бетін зерттеуге және онда жылжуға арналған мобильді кешендер;

• автоматтандырылған ғылыми құрылғылар;

• жерүсті басқару және бағдарламалық қамтамасыз ету жүйелері.

Жобаның басты мақсаты — Айды терең ғылыми тұрғыда зерттеу және оны бейбіт мақсатта пайдалану.

Бұл бастама ғарыш ғылымын жаңа деңгейге көтеріп, адамзаттың Айды зерттеу мүмкіндігін айтарлықтай кеңейтпек.