Атырауда үздік ғылыми жобалардың авторлары марапатталды

Атыраудағы Достық үйінде Н.Назарбаевтың қоғамдық келісім мен жалпыұлттық бірліктің қазақстандық моделіне арналған үздік ғылыми жобалардың өңірлік конкурсының марапаттау рәсімі өтті.

Шараға Атырау инжинерлік-гуманитарлық институты мен Х. Досмұхамедов атындағы Атырау мемлекеттік университетінің оқытушылары, магистранттар және конкурсқа қатысуға ниет білдірген жас ғалымдар қатысты.

Байқауға қатысушылардың жұмыстарын бағалауға сарапшылық еткен комиссия мүшесінің төрайымы Жамиляш Хасанова жыл сайын ғылымға ден қойған жастардың саны артып келе жатқанын, сондай-ақ, биылғы тапсырылған жұмыстардың тың дүниелермен толыққанына жан-жақта талдау жасап айтып кетті. Одан әрі үздік ғылыми жобалар анықталды.

Нәтижесінде, І дәрежелі дипломмен және ақшалай сыйлықпен «Сарайшық» мемлекеттік тарихи-мәдени музей қорығының ғылыми қызметкері Амангелді Жұмабаев, ІІ дәрежелі дипломмен және ақшалай сыйлықпен Атырау инженерлік-гуманитарлық институтының педагогика ғылымдарының магистрі Әсел Ығылова және ІІІ дәрежелі дипломмен және ақшалай сыйлықпен Сафи Утебаев атындағы мұнай-газ университетінің студенті Анна Цой мен «Сарайшық» мемлекеттік тарихи-мәдени музей қорығының ғалым хатшысы Жанар Диярова марапатталды.