Қасым-Жомарт Тоқаев: Отаншыл азаматтар қашанда бағалы

Қоғамда қызу талқыланып жатқан тағы бір мәселе – кадр саясаты туралы мемлекет басшысы Ұлттық құрылтайда айтты,- деп хабарлайды El.kz.

– Әділетті Қазақстанды құру кадрлардың орнын ауыстыра беру деген сөз емес. Өз ісін жетік білетін кәсіби мамандар, отаншыл азаматтар қашанда бағалы. Мемлекеттік қызметшілерге қандай да бір кланның мүшесі ретінде қарауға болмайды. Әрине, олардың құрамын жаңартып отырған дұрыс. Бірақ, мұны терең ойланып, байыппен жасау қажет. Кадрларды жаппай жұмыстан шығару жақсылыққа апармайды,- деді мемлекет басшысы.

Қасым-жомарт Тоқаевтың пайымынша, кадрларды біртіндеп ауыстыру керек

«Әлеуметтік желіде «ескі кадрмен Жаңа Қазақстанды қалай құруға болады?» дейтіндер бар. Бұл – орынды сұрақ»,- деді президент.

Мемлекет басышысы мемлекеттік қызметшілерді қолынан түк келмейді деп кемсітуді доғару керектігін айтты. Тіпті, оларды «Халық жаулары» сияқты көретіндер де бар. «Шенеунік» деген сөз жағымсыз ұғымға айналып барады. Бұл – дұрыс емес,- деді ол.

Президенттің айтуынша мемлекеттік қызметте адал әрі білікті кадрлар өте көп. Олар Отанымыздың игілігі жолында тынбай еңбек етіп жүр. «Бірақ, өкінішке қарай, «Бір қарын майды бір құмалақ шірітеді» деген де бар. Ондай адамдармен біз бірден қоштасып жатырмыз. Болашақта да солай болады»,- деді президент.