Астанада шаршы алаңға шығуға асықпын - Баходир Жалолов

5 сәуірде Астанадағы "Барыс Арена" спорт кешенінде тарихи бокс кеші өтпек. Battle of the Brave деп аталатын бұл турнирде әлемдік деңгейдегі жұлдызды боксшылар шаршы алаңға шығады. Кештің басты оқиғаларының бірі – екі дүркін Олимпиада чемпионы, ауыр салмақтағы үздік нокаутер Баходир Жалоловтың (14-0, 14 КО) жекпе-жегі болмақ, деп хабарлайды El.kz ақпарат агенттігі.

Баходир Жалолов өзінің жеңісті сериясын жалғастыру мақсатында 10 раундтық айқасқа түседі. Қарсыласының есімі кейінірек жарияланады. Бұл жекпе-жек бокс кешінің андеркарт бағдарламасының көркін қыздыра түспек.

Бұл сәтті ұзақ күттім және Астанадағы рингке оралуға асықпын. Менің мақсатым – жоғары деңгейде өз өнерімді көрсету және рейтингтерде көтерілуді жалғастыру. Бұл – мансабымдағы маңызды қадам, сондықтан жанкүйерлеріме нокаут сыйлау үшін бар күшімді салып, дайындалып жатырмын, – деді Баходир Жалолов.

Кештің басты жекпе-жегінде орта салмақтағы IBF және WBO тұжырымдары бойынша әлем чемпионы Жәнібек Әлімханұлы (16-0, 11 KOs) өз титулдарын алғаш рет туған жерінде қорғайды. Оның қарсыласы – ешкімге жеңіліп көрмеген, титулға үміткер Анауэль Нгамиссенгуа (14-0, 9 KOs). Nomad Promotions пен Top Rank бірлесіп ұйымдастырған бұл тарихи оқиға қазақстандық бокстың маңызды кезеңі болмақ.

Тамаша бағдарлама дайындап жатырмыз, Жалолов – оның басты жұлдыздарының бірі. Оның жекпе-жегін мен де, жанкүйерлері де асыға күтіп отырмыз. Жалолов Өзбекстанда және бүкіл өңірде үлкен танымалдылыққа ие, сондықтан біз оны және оның жанкүйерлерін Астанада қарсы алуға қуаныштымыз,- Nomad Promotions негізін қалаушы Рустам Қуаншалиев.

Top Rank төрағасы Боб Арум Баходир Жалоловтың аталмыш турнирге қатысуы – Астанадағы бұл ауқымды оқиғаның маңыздылығын арттыратынын атап өтті.

Ол – болашақ ауыр салмақтағы әлем чемпионы, мен оның жанкүйерлерге керемет шоу сыйлайтынына сенімдімін,-деді ол.

Екінші жартылай жеңіл салмақтағы IBF Құрлықаралық және WBA Құрлықтық титулдары үшін 10 раундтық жекпе-жекте Сұлтан Заурбек (19-0, 13 KOs) Оңтүстік Африкадан келген, бұрынғы әлем чемпионына үміткер Азинга Фузилемен (18-2, 12 KOs) кездеседі. Қазақстанның ең мықты таланттарының бірі Заурбек чемпиондық жекпе-жектің алдында тұр және өз жанкүйерлеріне жарқын өнер көрсетуге дайын.

Әлемдік рейтингтегі қазақстандық үміткер Батыржан Джүкембаев (23-1, 17 KOs) екінші жартылай орта салмақтағы WBA Құрлықтық чемпионы атағы үшін 10 раундтық жекпе-жекте Кейн Гарднермен (17-4, 7 KOs) жұдырықтасады.

Бұрынғы әлем чемпиондығына үміткер Отобек Холматов (12-1, 11 KOs) көптен күткен рингке қайта оралады. Ол жартылай жеңіл салмақта өтетін сегіз раундтық жекпе-жекте сенсация жасауға ниетті филиппиндік Джейсон Каной Манигоспен (30-12-2, 20 KOs) қолғап түйістіреді.

Қазақстандық нокаут шебері Балауса Муздиман (6-0, 5 KOs) екінші ең жеңіл салмақтағы сегіз раундтық жекпе-жекте жеңіліп көрмеген америкалық Розалинда Родригеске (14-0, 3 KOs) қарсы тұрып, жеңісті сериясын жалғастыруды көздейді.

Айта кетсек, Қазақстанда алғаш рет өтетін бұл тарихи сәт – ұлттық мақтаныштың айғағы іспеттес. Айтулы кеш боксшыларға өз елінде өнер көрсетіп, ең жоғары деңгейде бәсекелесуге мүмкіндік береді.