Ақтөбедегі «Study in Kazakhstan» көрмесіне 3 мыңға жуық оқушы қатысты

Қ.Жұбанов атындағы Ақтөбе өңірлік университетінде 10-11 сынып оқушыларына арналған «Study in Kazakhstan» ауқымды көшпелі білім беру көрмесінің екінші күні өтті, деп хабарлайды El.kz ақпарат агенттігі.

Ғылым және жоғары білім министрлігінің мәліметінше, көрмеге 3 мыңға жуық оқушы мен олардың ата-аналары қатысты.

Көрме барысында олар жетекші қазақстандық университеттер мен шетелдік жоғары оқу орындарының филиалдары өкілдерімен тікелей сұхбаттасып, оқуға түсу шарттары, білім бағдарламалары, 2025 жылғы ҰБТ ерекшеліктері және гранттар туралы толық ақпарат алды, - делінген мәліметте.

Сонымен қатар оқушылар ғылым және жоғары білім министрінің кеңесшісі Руслан Емелбаев, Ғылым және жоғары білім министрлігінің Жоғары және жоғары оқу орнынан кейінгі білім комитеті төрағасының орынбасары Ақерке Абылайхан және MDSG жобасының батыс аймағындағы жоба жетекшісі Еркін Есеркеповпен кездесіп, іс-шараның маңыздылығы мен мамандық таңдау бойынша құнды кеңестер алды.