Алматыда 500 адамға арналған жаңа емхана салынады

Алматының Алмалы ауданында 500 адамға арналған емхана салынады. Бұл туралы қала әкімі Ерболат Досаев тұрғындармен кездесу кезінде айтты, – деп хабарлайды El.kz порталы ҚазАқпаратқа сілтеме жасап.

Оның айтуынша, Алмалы ауданы денсаулық сақтаудың сапалы жүйесінің орталығы болғандықтан, мұндағы емханаға қаланың және облыстың басқа аудандарының тұрғындары тіркелуге ұмтылады.

– 443 мың адам тұратын ауданда жақын маңдағы Бостандық, Жетісу және Түрксіб аудандарының тұрғындарының тіркелуіне байланысты ауданның 18 емханасы 2 есеге артық пациенттерге қызмет көрсетуде. Сондықтан бұл мәселені шешу үшін бүгінде 1947 жылы салынған ескі ғимаратты бұзып, ревматология орталығының орнында 500 келушіге арналған жаңа емхана құрылысының жобалау-сметалық құжаттамасы әзірленіп жатыр. Оған қаражат бөлінді, - деді Алматы әкімі Ерболат Досаев.

Құрылысты 2024 жылы бастау жоспарланып отыр. Сондай-ақ, Райымбек даңғылы бойында психикалық дамуы тежелген балаларға арналған бассейні бар спорт орталығын салуға ЖСҚ әзірлеу жоспарлануда.