Әліби Ыдырыс UFC-ге шығуы мүмкін

NAIZA ұйымында ең жеңіл салмақта чемпион атанған қазақстандық файтер Әліби Ыдырыстың әлемдегі жетекші ММА лигасындағы алғашқы жекпе-жегінің уақыты мен қарсыласы белгілі болды, деп хабарлайды El.kz интернет порталы.

ММА сарапшысы Марсель Дорфф хабарлағандай, Әліби өз дебютінде ямайкалық спортшы Оде Осборнмен (13-9) октагонға шығуы тиіс. Кездесу 21 ақпанда Хьюстон (АҚШ) қаласында өтетін UFC турнирінің бағдарламасына енгізілген.

Айта кетсек, Осборн 2023 жылдың 5 тамызында тағы бір қазақстандық Асу Алмабаевпен (23-3) кездесіп, сол жекпе-жекте екінші раундта техникалық жеңіліспен ұтылған еді.

Еске сала кетейік, тамыз айында Әлібидің Джозеф Моралеспен өткізген айқасында UFC-мен келісімшарт мәселесі тұрған болатын. Сол кезде Әліби UFC 319 іріктеу кезеңінде жеңілгеніне қарамастан, промоушен оның әлеуетін жоғары бағалап, төрт жекпе-жекке арналған келісімшарт ұсынған.