Әлем чемпионаты: Франция Марокконың жолын тағы кесті

Франция құрамасы 2026 жылғы футболдан әлем чемпионатының ширек финалында Марокконы 2:0 есебімен жеңіп, турнирдің жартылай финалына жолдама алды. Бостонда өткен кездесуде Килиан Мбаппе мен Усман Дембеле гол соғып, Дидье Дешам шәкірттеріне маңызды жеңіс сыйлады.

Бұл екі құраманың әлем чемпионатындағы кезекті текетіресі болды. 2022 жылғы мундиальдың жартылай финалында да Франция дәл осы есеппен жеңіске жеткен еді. Осы жолы да француздар марокколықтардың сенімді қорғанысын бұзып, турнирдегі жорығын аяқтады.

Кездесу тартысты басталды. Алғашқы минуттардан-ақ Франция допты көбірек бақылап, шабуыл ұйымдастыруға тырысты. Килиан Мбаппе айып алаңы сыртынан қауіпті соққы жасаса, көп ұзамай бұрыштамадан кейін қорғаушы Дайо Упамеканоның баспен бағыттаған добы қақпаға қауіп төндірді. Алайда Марокко қақпашысы Яссин Буну екі жағдайда да шеберлік танытып, командасын голдан құтқарды.

Матчтың шешуші сәттерінің бірі 28-минутта орын алды. Марокко қорғаушылары доптан айырылып қалғаннан кейін Мбаппе айып алаңына қарай ұмтылды. Нуссайр Мазрауи оны ереже бұзып тоқтатты, ал бас төреші пенальти белгіледі. Алайда 11 метрлік айып добын орындаған Мбаппе әлсіз соққы жасап, Буну тағы да өз шеберлігін көрсетті.

Пенальтиден кейін де Франция қысымын үдетті. Дезире Дуэнің төмен бағытталған соққысын Буну қайтарса, бірінші таймның қосымша уақытында Люка Диньнің алыстан тепкен добы қақпа бағанасына тиді. Марокко болса негізінен қарсы шабуылдарға сенім артты. Ашраф Хакимидің айып добынан кейінгі соққысы нысанаға сәл жетпей өтті.

Үзілістен кейін Марокко ойынды жандандыруға тырысты. Бірнеше жылдам шабуыл ұйымдастырғанымен, Франция қорғанысы сенімді әрекет етті. Браим Диастың қауіпті пасын Жюль Кунде дер кезінде тоқтатып, шабуылды үзіп жіберді.

Ойынның тағдыры 60-минутта шешіле бастады. Адриен Рабьо ортаңғы алаңда допты тартып алып, шабуылды Дезире Дуэге жалғады. Ол өз кезегінде Мбаппеге тамаша пас шығарды. Франция шабуылшысы айып алаңы сызығының маңынан дәл әрі әдемі соққы жасап, есеп ашты. Осылайша ол бірінші таймдағы жіберіп алған пенальтидің есесін қайтарды.

Араға алты минут салып Франция басымдығын еселей түсті. Усман Дембеле допты ортадан алып шығып, бірнеше қорғаушыдан өтіп, айып алаңының шетінен қақпаның төменгі бұрышына дәл соққы жасады. Бұл голдан кейін есеп 2:0 болып, матч тағдыры іс жүзінде шешілді.

Екі доп айырмасынан кейін Марокко құрамасының бас бапкері Мохамед Уахби құрамға бірнеше өзгеріс енгізіп, Софьян Амрабат, Суфьян Рахими, Жессим Яссин және Закария Эль-Уахдиді алаңға шығарды. Алайда бұл ауысулар ойын барысына айтарлықтай әсер ете алмады. Француздар допты өз бақылауында ұстап, қарсыласына қауіпті мүмкіндік берген жоқ.

Осылайша Франция құрамасы 2:0 есебімен сенімді жеңіске жетіп, әлем чемпионатының жартылай финалына шықты. Енді Дидье Дешам шәкірттері финал жолдамасы үшін Испания мен Бельгия арасындағы ширек финалдық кездесудің жеңімпазымен күш сынасады. Ал Марокко құрамасы бұл жолы да плей-офф кезеңінде Франция тосқауылынан аса алмай, турнирмен қоштасты.

Бұған дейін Қазақстан клубтары еурокубоктағы алғашқы матчтарын өткізген еді.