Алаяқ әйел астаналықтарға жоқ жиһазды сатып келген

Қаскүнем танымал «OLX» интернет-платформасында жалған мәліметтер мен фотосуреттерді көрсете отырып, жоқ жиһазды сату туралы «фейк» хабарландырулар орналастырған, деп хабарлайды El.kz ақпарат агенттігі.

Астана қалалық прокуратурасының мәліметінше, жәбірленушілердің бірі сотталғанның 50 мың теңгелік диван сатқаны туралы жалған хабарландыруына қызығушылық танытып, оның дұрыстығына көз жеткізбей және диванды жеке өзі көрмей, алдын ала төлем жасап, кінәлінің абоненттік нөмірінің балансын 40 мың теңгеге толықтырған.

Көрсетілген соманы иемденіп алғаннан кейін, сотталған байланысқа шығуды тоқтатқан. Қылмыстық әрекеттерінің нәтижесінде жалпы сомасы 2 млн теңгеден асатын 40-тан астам жәбірленуші зардап шеккен, - делінген мәліметте.

Сотталушы кінәсін толық мойындап, барлық жәбірленушілерге келтірілген залалды өтеді.

Сот үкімімен кінәлі жас баланың болуына байланысты жазасын кейінге қалдыра отырып, 3 жыл 6 айға бас бостандығынан айыру жазасына сотталды.