А. Мурадов: Өңірлер ҚХА әзірлеген Волонтер жылының тұжырымдамасы төңірегінде ауқымды іс-шаралар атқарады

Қазақстан Республикасы Парламенті Мәжілісінің депутаты Ахмет Мурадов Маңғыстау облысына жұмыс сапарымен келді.

Оның барысында Қазақстан халқы Ассамблеясы атынан сайланған депутат Ақтаудағы Достық үйінде этномәдени бірлестік төрағалары және «Жаңғыру жолы» өңірлік жастар қозғалысының мүшелерімен кездесіп, Парламент мәжілісінің 2019 жылы атқарған жұмыстары туралы қысқаша ақпарат берді.

«Бүгінде Қазақстан бірлік пен қоғамдық келісімнің алтын бесігіне айналды. Еліміздегі татулық пен ынтымақтың бірегей үлгісін жаһан жұртшылығы зерделеп, қазақ мемлекетінің беделі жылдан жылға артып келеді», - деді М. Ахмедов.

Сонымен қатар депутат «Педагог мәртебесі туралы» қабылданған Заң жобасының жаңашылдықтарына тоқталды. Жаңа заң тұстарын әзірлеудің негізгі идеясы — мұғалімдердің жүктемесін азайту, олардың міндетіне жатпайтын жұмыстарды орындаудан босату, сонымен қатар мұғалімдердің жалақысын арттыруға, еңбек демалысын ұлғайтуға, педагогтік шеберлік, тәлімгерлік үшін қосымша ақы төлеуге бағытталған шаралар.

Мәжіліс депутаты Волонтерлер жылына да тоқталып өтті. «Мемлекет басшысының жарлығымен 2020 жыл «Волонтерлер жылы» деп жарияланды. Осыған орай Қазақстан халқы Ассамблеясы 4 бағыт бойынша Тұжырымдама әзірледі. Қазақстанның барлық өңірлері сол тұжырымдамаға сәйкес ауқымды іс-шараларды өткізуге ат салысатын болады», - деді спикер.