500 теңгеден басталады: Астанада LRT-ның жаңа тарифтері қандай болады

1 тамыздан бастап Астанадағы Tarlan Astana жеңіл рельсті көлік (LRT) желісінде жол жүрудің жаңа тарифтік жүйесі қолданысқа енгізіледі. Бұл туралы City Transportation Systems (CTS) компаниясы хабарлады.

Жаңа тарифтер қандай болады?

Компанияның мәліметінше, жаңа тарифтік жүйе жолаушыларға ыңғайлы болу үшін әзірленген. Бір реттік жол жүру құны бұрынғыдай 200 теңге болып қалады.

1 тамыздан бастап келесі мерзімдік жол жүру билеттері қолжетімді болады:

• 1 күндік – 500 теңге;
• 3 күндік – 1 500 теңге;
• 5 күндік – 2 500 теңге;
• 10 күндік – 4 000 теңге;
• 15 күндік – 5 000 теңге;
• 1 айлық – 7 500 теңге;
• 3 айлық – 20 000 теңге.

Сонымен қатар белгіленген сапар санына арналған тарифтер де енгізіледі:

• 5 сапар – 900 теңге;
• 10 сапар – 1 800 теңге;
• 20 сапар – 3 500 теңге;
• 30 сапар – 5 000 теңге.

Тарифтер қалай қолданылады?

CTS компаниясы тарифтерді пайдалану тәртібін де түсіндірді. Егер айлық жол жүру билеті ағымдағы айдың 15-іне дейін (қоса алғанда) сатып алынса, ол сол айдың соңына дейін жарамды болады.

Ал 15-інен кейін сатып алынған жағдайда билет келесі айдың 1-күнінен бастап күшіне енеді.

Айлық тариф сатып алынған күнтізбелік айдың 1-інен бастап 30-ына (немесе 31-іне) дейін қолданылады.

Күндік жол жүру билеттері мен белгілі бір сапар санына арналған пакеттер алғашқы рет валидатордан өткен сәттен бастап іске қосылады. Олар сол күннің соңына дейін (сағат 00:00-ге дейін) немесе сатып алынған сапар саны толық пайдаланылғанға дейін жарамды болады.

Жол жүру билетін қалай сатып алуға болады?

Тарифтерді LRT станцияларындағы кассалардан сатып алуға болады. Олар Tarlan Astana көлік картасына жазылады.

Көлік картасындағы қалдық қаражатты кассада немесе станция терминалдары арқылы тексеруге болады.

Егер көлік картасы жоғалса, оған бұрын жүктелген әрі белсенді тарифтер қалпына келтірілмейді және басқа картаға ауыстырылмайды.

Қазіргі уақытта бұл тарифтер тек Tarlan Astana жеңіл рельсті көлік жүйесінде ғана жарамды. Сонымен қатар оларды қалалық автобустар жүйесімен біріктіру жұмыстары жүргізіліп жатыр.

Еске салайық, бұған дейін аты Tarlan Astana деп өзгерген LRT рельсі өртенген еді.