«30 жыл бойы қызмет еткен». Жамбылда теміржол қызметкерлерін пойыз қағып кетті

Жамбыл облысындағы Шу станциясы аумағында пойыз қағып кеткен 2 қызметкер оқиға орнында көз жұмды, деп хабарлайды El.kz ақпарат агенттігі.

Оқиға 21 қаңтарда Шу-Шығанақ пен Жиделі-Бірлік учаскесінің аралығында болған. Шу станциясы аумағында 4 қызметкер вагондардан түсіп қалған пойыз жабдықтарын іздеуге шыққан. Сол мезетте №71 пойыз екі қызметкерді қағып кеткен. Екі қызметкер де алған жарақаттарынан көз жұмған.

Ер адамның бірі 62, екіншісі 57 жаста болған. Екеуі де теміржол қызметінде 20-30 жылға жуық қызмет атқарған. 

Шығанақ-Шу учаскесінің маңында теміржол көлігінің екі қызметкерімен жазатайым оқиға болды. Пойыз жүргізушісі тежегішті басқанымен апаттан құтылу мүмкін болмады. Барлық мән-жайларды анықтау үшін оқиға орнына ҚТЖ комиссиясы барды. Тергеу басталды, - деп хабарлады Қазақстан темір жолы компаниясының өкілдері.

Компания қызметкерлердің отбасыларына көңіл айтып, оларға қажетті көмек көрсететінін жеткізді.