20 жастағы гроссмейстер халықаралық турнирде қола жүлдеге ие болды

Қазақстандық гроссмейстер Қазыбек Нөгербек Францияның Канн қаласында өткен Festival International des Jeux 2025 халықаралық шахмат турнирінде жоғары нәтиже көрсетті, деп хабарлайды El.kz ақпарат агенттігі.

20 жастағы шахматшы 9 турдың қорытындысы бойынша 7 ұпай жинап, жүлделі үшінші орынға ие болды.

Турнирдің соңғы кезеңінде Қазақстанның екі гроссмейстері – Қазыбек Нөгербек пен 24 жастағы Әлішер Сүлейменов өзара кездесіп, тартысты ойын көрсетті.

Спортты дамыту дирекциясы бұл партия турнирдегі ең қызықты кездесулердің бірі болғанын атап өтті.