Әлемдегі ең ықпалды адамдардың бірі саналатын Microsoft компаниясының негізін қалаушы Билл Гейтс АҚШ Конгресінің Джеффри Эпштейн ісін тергеу жөніндегі комитетінде куәлік береді. Оның есімі бұған дейін жарияланған Эпштейн құжаттарында бірнеше рет аталған, деп хабарлайды El.kz интернет порталы.
Эпштейн ісі не жайлы?
Джеффри Эпштейн – америкалық қаржыгер әрі миллиардерлер мен саясаткерлердің ортасында жүрген ықпалды тұлға. Алайда оның аты қаржы саласындағы жетістіктерімен емес, кәмелетке толмаған қыздарды сексуалдық мақсатта пайдаланған қылмыстарымен әлемге әйгілі болды.
2008 жылы ол Флорида штатында кәмелетке толмаған қыздан жыныстық қызмет сатып алғанын мойындаған. Алайда сол кезде салыстырмалы түрде жеңіл жаза алып, қоғамда «байлар үшін бөлек заң бар ма?» деген пікір туғызды.
2019 жылы Эпштейнге қайтадан ауыр айыптар тағылды. АҚШ Әділет министрлігінің мәліметінше, ол жылдар бойы кәмелетке толмаған қыздарды өзіне және таныстарына қызмет көрсету үшін тартқан. Тергеу барысында қыздардың кейбірі небәрі 14 жаста болғаны айтылды.
Сол жылы Эпштейн Нью-Йорктегі тергеу изоляторында қайтыс болды. Ресми нұсқа бойынша ол өзіне қол жұмсаған. Бірақ оның өлімі көптеген күдік пен қастандық теорияларының тууына себеп болды.
Неге бұл іс әлем назарында?
Эпштейннің жеке байланыстары өте кең болған. Ол саясаткерлермен, миллиардерлермен, ғалымдармен және шоу-бизнес өкілдерімен араласқан.
Тергеу барысында жарияланған құжаттарда көптеген ықпалды адамдардың есімдері кездеседі. Алайда құжатта аты аталған адамның қылмысқа қатысы бар дегенді білдірмейді. Көпшілігі өздерінің заңсыз әрекеттерге қатысы жоқ екенін мәлімдеген.
Соңғы жылдары Конгресс дәл осы байланыстардың сипатын анықтауға тырысып келеді.
Билл Гейтс пен Эпштейнді не байланыстырды?
Жарияланған құжаттарға сәйкес, Гейтс пен Эпштейн 2011 жылдан бастап бірнеше рет кездескен. Олардың хат алмасулары мен кездесулеріне қатысты жазбалар тергеу материалдарынан табылған.
Гейтс Эпштейнмен қайырымдылық жобаларын талқылау үшін ғана кездескенін айтады. Ол Эпштейннің қылмыстары туралы ештеңе білмегенін бірнеше рет мәлімдеген.
Кейін миллиардер бұл байланысты «өте үлкен қателік» деп атады.
Гейтс қорының өкілдері де Эпштейнмен ешқандай ортақ қор құрылмағанын және оған қаржылай төлем жасалмағанын хабарлады.
Конгрестегі жаңа сұрақтар
АҚШ Конгресінің Бақылау комитеті қазір Эпштейннің ықпалды тұлғалармен байланысын зерттеп жатыр. Бұған дейін комитет алдында АҚШ-тың бұрынғы президенті Билл Клинтон да жауап берген болатын.
Енді заң шығарушылар Билл Гейтстен оның Эпштейнмен қарым-қатынасының сипаты туралы сұрамақ. Қазіргі таңда Гейтске қатысты ешқандай қылмыстық айып тағылған жоқ.
Дегенмен Эпштейн ісі әлемдік элитаның жабық байланыстары, ықпал мен жауапкершілік мәселелері төңірегіндегі сұрақтарды қайта көтеріп отыр. Сондықтан бұл тергеудің әрбір жаңа кезеңі халықаралық БАҚ назарында қалып келеді.
