Әуе қатынасы саласында жаңа тарихи рекорд тіркелді. Airbus A350-1000ULR ұшағы тоқтаусыз 24 сағат 23 минут ұшып, коммерциялық авиация тарихындағы ең ұзақ үздіксіз әуе сапарын орындады.
Әлемдік рекорд қалай жаңарды?
FlightRadar24 деректеріне сәйкес, ұшақтың әуеде болған нақты уақыты 24 сағат 23 минут болды. Осылайша ол бұған дейінгі рекордты жаңартты. Бұрынғы көрсеткіш 2005 жылы Boeing 777-200LR ұшағына тиесілі болатын. Сол кезде әуе кемесі Гонконгтен Лондонға дейін жанармай құймай 22 сағат 42 минут ұшқан еді.
Рекорд иесі – Airbus A350-1000ULR (Ultra Long Range). Бұл модель аса ұзақ қашықтыққа ұшуға арнайы әзірленген.
Стандартты A350-1000 нұсқасымен салыстырғанда, бұл ұшақтың жанармай қоры едәуір ұлғайтылған әрі конструкциясына бірқатар техникалық өзгерістер енгізілген. Соның арқасында ол 18–19 мың шақырымнан астам қашықтықты еш қонбай еңсере алады.
Ұшақ 238 жолаушыға арналған. Оның ішінде:
- 6 бірінші кластағы люкс;
- 52 бизнес-класс люксі;
- 40 премиум-эконом орны;
- аяққа арналған кеңістігі ұлғайтылған 140 эконом-класс орны бар.
Сондай-ақ жолаушылар демалып, сергіп алатын арнайы аймақ қарастырылған.
Рекордтық рейс қалай өтті?
F-WULR рейсі австралиялық Qantas Airways әуе компаниясының Project Sunrise жобасы аясында орындалды. Компания бұл жобаны 2017 жылы бастаған. Оның басты мақсаты – Австралияны Еуропа мен Солтүстік Американың ірі қалаларымен аралық қонусыз байланыстыратын тұрақты бағыттарды іске қосу.
Рекордтық ұшу 27 шілдеде Мельбурн қаласынан басталып, келесі күні Airbus компаниясының Францияның Тулуза қаласындағы штаб-пәтерінде аяқталды.
Ұшақ Тынық мұхиты, Солтүстік Америка және Атлант мұхиты арқылы жалпы 23 076 шақырым қашықтықты еңсерді. Рейс сынақ мақсатында орындалғандықтан, бортта жолаушылар болған жоқ. Ұшақта Airbus инженерлері мен Qantas компаниясының бірнеше ұшқышы ғана болды.
Мыңдаған адам онлайн бақылаған рейс
Қону алдында әуе кемесі біраз уақыт аспанда айналып ұшуға мәжбүр болды. Дәл осы сәтте FlightRadar24 сервисінде рейсті нақты уақыт режимінде 120 мыңнан астам адам бақылаған.
Qantas компаниясы алғашқы жолаушылар рейстерін 2027 жылы бастауды жоспарлап отыр. Ол үшін тасымалдаушы жақын уақытта 12 дана жаңартылған Airbus A350-1000ULR ұшағын қабылдайды.
Жаңа лайнерлер арқылы әлемдегі ең ұзақ тұрақты бағыттар ашылады. Олардың қатарында Сидней – Лондон және Сидней – Нью-Йорк бағыттары бар.
Мамандардың пікірінше, мұндай рейстер халықаралық әуе тасымалын жаңа деңгейге көтеріп, жолаушыларға аралық қонусыз құрлықаралық сапар жасауға мүмкіндік береді.
