Қазақстан мұсылмандары діни басқармасы 2027 жылғы діни мерекелердің алдын ала күнтізбесін жариялады. Оған сәйкес, келесі жылы қасиетті Рамазан айы 8 ақпанда басталады. Сондай-ақ Қадір түні, Ораза айт және Құрбан айт мерекелерінің күндері анықталды.
2027 жылы ораза қашан басталады?
Қазақстан мұсылмандары діни басқармасының мәліметінше, 2027 жылы мұсылмандар 8 ақпаннан бастап ораза ұстайды. Ал Ораза айт мерекесі 9 наурызға сәйкес келеді.
Рамазан – мұсылмандар үшін қасиетті ай. Бұл уақытта ораза ұстаған жандар таң атқаннан күн батқанға дейін ішіп-жеуден тыйылып, құлшылыққа, қайырымдылық жасауға және рухани тазаруға ерекше көңіл бөледі.
Ислам күнтізбесі бойынша Рамазан айы 29 немесе 30 күнге созылады. Оның аяқталуы Ораза айт мерекесімен жалғасады. Дегенмен ҚМДБ бұл күндердің әзірге алдын ала белгіленгенін ескертті. Жаңа айдың көрінуіне байланысты оразаның басталуы мен діни мерекелердің уақыты өзгеруі мүмкін.
2027 жылғы діни мерекелер күнтізбесі
ҚМДБ жариялаған күнтізбеге сәйкес, келесі жылы мұсылмандар үшін маңызды күндер төмендегідей белгіленген:
- Бараат түні – 22 қаңтардан 23 қаңтарға қараған түн;
- Рамазан айының басталуы – 8 ақпан;
- Қадір түні – 5 наурыздан 6 наурызға қараған түн;
- Ораза айт – 9 наурыз;
- Құрбан айт – 16–18 мамыр.
Қадір түні қашан болады?
2027 жылы Қадір түні 5 наурыздан 6 наурызға қараған түнге сәйкес келеді.
Қадір түні – Рамазан айындағы ең қасиетті түндердің бірі. Ислам дінінде бұл түннің орны ерекше. Өйткені Құранның алғашқы аяттары Мұхаммед пайғамбарға осы түнде түсе бастаған деп есептеледі.
Мұсылмандар Қадір түнін құлшылықпен өткізіп, дұға жасайды, күнәлары үшін кешірім сұрап, жақсылық пен береке тілейді. Сондай-ақ мұқтаж жандарға көмектесіп, қайырымдылық жасауға мән береді.
Кімдерге ораза ұстамауға болады?
Ислам дінінде ораза ұстау балиғат жасына жеткен, ақыл-есі дұрыс әрі денсаулығы жарамды мұсылмандарға парыз саналады. Алайда белгілі бір жағдайларда ораза ұстамауға рұқсат беріледі.
Мәселен, денсаулығына байланысты ораза ұстауға шамасы келмейтін науқастар мен қарт адамдарға, сондай-ақ сапардағы жолаушыларға жеңілдік қарастырылған. Жүкті және бала емізетін әйелдер де өзіне немесе баласына зиян келу қаупі болған жағдайда оразасын кейінге қалдыра алады.
Балиғат жасына жетпеген балаларға ораза ұстау міндеттелмейді.
Мұндай жағдайларда оразаның қазасын өтеу немесе пітірден бөлек фидия беру тәртібі әр адамның жағдайына байланысты анықталады. Сондықтан діни мәселелер бойынша имамнан, ал денсаулыққа қатысты сұрақтар туындаса, дәрігерден кеңес алған дұрыс.
Ораза кезінде қандай әрекеттерден тыйылу керек?
Рамазан айында мұсылмандар тек тамақ пен судан бас тартып қана қоймай, мінез-құлқына, сөзі мен ісіне де мән береді.
Ораза ұстаған адам таң атқаннан күн батқанға дейін тамақ ішпейді, су ішпейді, темекі шекпейді және жыныстық қатынасқа түспейді. Бұл әрекеттер оразаны бұзады.
Ал өтірік айту, біреуді ғайбаттау, балағаттау, жанжал шығару секілді жағымсыз әрекеттерден әрдайым аулақ болу қажет. Олар оразаны тікелей бұзбағанымен, оның рухани мәніне қайшы келеді.
Сондай-ақ Рамазан айында ысырапшылдыққа жол бермей, ас-ауқатты мөлшермен тұтынуға, мұқтаж жандарға көмектесуге және айналадағы адамдарға мейірімді болуға ерекше көңіл бөлінеді.
Рамазан айына қалай дайындалған дұрыс?
Оразаға алдын ала дайындалу күнделікті өмірдегі өзгерістерге жеңіл бейімделуге көмектеседі. Әсіресе алғаш рет ораза ұстайтын адамдарға күн тәртібі мен тамақтану әдетін ертерек реттеген пайдалы.
Ең алдымен ұйқы мен демалыс уақытын жоспарлаған жөн. Өйткені Рамазан кезінде сәресіге ерте тұрып, кешкі уақытта ауыз ашуға тура келеді.
Тамақтану тәртібіне де назар аудару маңызды. Мамандар майлы, ащы тағамдарды, кофе мен газдалған сусындарды шамадан тыс тұтынбауға кеңес береді. Ал ауызашар мен сәресі арасында жеткілікті мөлшерде су ішу ағзаның сусыздануының алдын алуға көмектеседі.
Сонымен қатар оразаның негізгі ережелерін алдын ала біліп, құлшылыққа, отбасыға және қайырымдылық жасауға уақыт бөлген дұрыс.
Бұған дейінгі жылдардан қарыз оразасы қалған адамдар оның өтелу тәртібін де алдын ала нақтылап алғаны жөн.
2027 жылы Құрбан айт қай күндері өтеді?
ҚМДБ күнтізбесіне сәйкес, 2027 жылы Құрбан айт 16 мамырда басталып, 18 мамырға дейін жалғасады.
Құрбан айт – ислам дініндегі екі үлкен мерекенің бірі. Ол Ибраһим пайғамбардың Аллаға деген сенімі мен мойынсұнуын еске алуға арналған.
Бұл күндері мұсылмандар айт намазын оқып, құрбандық шалады. Құрбандық еті туыстарға, көршілерге және мұқтаж отбасыларға таратылады. Мереке адамдарды жақсылық жасауға, бір-біріне қамқор болуға және қайырымдылыққа үндейді.
Діни мерекелердің күндері өзгеруі мүмкін бе?
Қазақстан мұсылмандары діни басқармасы жарияланған күнтізбедегі мерзімдердің өзгеруі мүмкін екенін ескертті.
Діни мерекелердің уақыты исламның ай күнтізбесі бойынша анықталады. Сондықтан жаңа айдың көрінуіне қарай кейбір күндер бір тәулікке алға немесе кейін жылжуы ықтимал.
ҚМДБ мәліметінше, хижра айларының басталуы халықаралық астрономиялық зерттеу орталықтарының деректері негізінде есептелген.
Осыған байланысты мұсылмандарға Рамазан айы мен діни мерекелер жақындаған кезде ҚМДБ-ның ресми хабарламаларын қадағалау ұсынылады.
