Табиғи өрттерді сөндіру бойынша «Орман-2023» тактикалық оқу-жаттығулары өтті
Іс-шара «Көкшетау» мемлекеттік ұлттық паркінің аумағында өтті, деп хабарлайды El.kz ақпараттық агенттігі.
Іс-шараға әкімдік өкілдері, Ақмола және Солтүстік Қазақстан облыстарының ТЖД басшылары мен қызметкерлері, Көкшетау мемлекеттік ұлттық табиғи паркінің, сондай-ақ «Қазавиаорманқорғау» РМҚК қызметкерлері және еріктілер қатысты.
Оқу-жаттығулар ерекше қорғалатын табиғи аумақтарда орман және дала өрттерін сөндіру жөніндегі күштер мен құралдарды басқару органдарының өзара іс-қимылын пысықтау, сондай-ақ өртке қарсы күресте барлық қызметтер арасында өрт бойынша, оны сөндірудің әдістері мен тәсілдері туралы жедел ақпарат алмасу мақсатында өткізілді.
«Көкшетау» ұлттық паркінен шараға 20 адам және өртке қарсы бірнеше техникасы жұмылдырылды: 6 бірлік - АЦ 40 өртке қарсы автокөлігі, тіркеме жабдығы бар тракторлар - 6 бірлік; ШОПК - 2 бірлік. Жиын барысында парк қызметкерлері «Орманды және далалық алқаптарда өртті ерте анықтау жүйесінің» презентациясы өткізілді.
Сонымен қатар, өрттің пайда болу аумағын аэровизуалды қарау, өрт десантын жерге түсіру, зардап шеккендерді «Зерен» жартасынан құтқару, «Көкшетау» МҰТП РММ-мен өрт сөндіру және авариялық-құтқару жұмыстары қызметі, Мәлік Ғабдуллин атындағы Азаматтық қорғаныс академиясының және жергілікті атқарушы органдар күштерінің өзара әрекеті, Альжанка ауылының тұрғындарын эвакуациялау, шатырлы қалашық ұйымдастырып, медициналық және психологиялық жәрдем көрсету, азық-түлікпен қамтамасыз ету сынды әрекеттер де көрсетілді.
Оқу-жаттығу қорытындысы бойынша жедел әрекет ету, өртті уақтылы анықтау, ерекше қорғалатын табиғи аумақтарда туындайтын орман және дала өрттерін сөндіру тәсілдері мен тактикасы бойынша іс-шаралар пысықталды.
Мұндай жаттығулар басқа ұлттық парктер мен орман шаруашылықтарының аумағында да өткізілген болатын.
Қысқа да нұсқа. Жазылыңыз telegram - ға