Парижде 2027 жылдың көктем-жаз маусымына арналған сән көрсетілімдері өтті. Dior, Chanel, Saint Laurent, Louis Vuitton және басқа да танымал сән үйлері жаңа топтамаларын таныстырды. Бұл жолы дизайнерлер қатаң пішімнен гөрі еркіндікке, жеңіл маталарға және күнделікті өмірге ыңғайлы киімдерге басымдық берген.
Сән көрсетілімдерінде мөлдір маталар, кең пішілген киімдер, спорттық үлгілер мен классикалық костюмдер қатар ұсынылды. Дизайнерлер сән үйлерінің қалыптасқан қолтаңбасын сақтай отырып, бұрыннан таныс үлгілерді жаңаша ұсынуға тырысқан.
Алдағы маусымда қандай киімдер сәнде болады? Париж сән апталығында таныстырылған 12 сән үйінің топтамасына шолу жасадық.
Dior: классикалық киімдерге жаңа көзқарас
Dior сән үйінің креативті директоры Джонатан Андерсон жаңа топтамасында брендке тән классикалық үлгілерді жеңіл әрі нәзік маталармен үйлестірген.
Көрсетілімде шифоннан, органзадан тігілген көйлектер, желбіршекті киімдер мен жеңіл жакеттер ұсынылды. Dior тарихындағы танымал Bar жакеті мен La Cigale көйлегі де жаңаша сипат алған.
Дизайнер дәстүрлі костюм матасына ұқсайтын, бірақ әлдеқайда жеңіл материалдарды пайдаланған. Мәселен, кейбір торкөз және жолақты жакеттер сырттай қалың матадан тігілгендей көрінгенімен, шын мәнінде органзаға ұқсас жұқа матадан жасалған.
Осылайша сән үйі өзіне тән классикалық үлгілерді сақтап, оларды күнделікті киюге ыңғайлы етуге мән берген.
Maison Margiela: ерекше дизайн мен күнделікті киім үйлесімі
Maison Margiela сән үйінің дизайнері Гленн Мартенс бұл маусымда бұрынғы топтамаларындағы күрделі пішіндер мен батыл шешімдерді біршама жеңілдеткен.
Жаңа топтамада күнделікті киюге болатын киімдер мен ерекше дизайнерлік үлгілер қатар кездеседі.
Көпшілік назарын винтаждық гүл өрнектері бар көйлектер мен белдемшелер аударған. Оларға брендке тән мақта таспалар қосылған. Сондай-ақ жаншылған күміс ыдыстардан жасалған сауытқа ұқсас сәндік бұйымдар ұсынылған.
Дизайнер бұл жолы ерекше пішіндермен қатар киімнің күнделікті өмірге жарамдылығына да көңіл бөлген.
Saint Laurent: алтын түсті киімдер мен қара көйлектер
Saint Laurent сән үйінде он жыл жұмыс істеген Энтони Ваккарелло жаңа топтамасында алтын түске ерекше басымдық берген.
Көрсетілімде алтын түстес шифон, органза, гипюр, парча, жаккард, жылтыр мақта мата және латекстен жасалған киімдер ұсынылды.
Дизайнер бренд тарихындағы танымал үлгілерді де жаңартқан. Олардың қатарында сафари стиліндегі жакеттер, қарындаш белдемшелер, классикалық костюмдер, коктейль көйлектері мен тренчтер бар.
Кейбір киімдер Ив Сен-Лоран жасаған әйгілі алтын түсті тренчті еске салады.
Ал көрсетілімнің соңғы бөлігінде тек қара түсті киімдер ұсынылған. Бұл жолы модельдер сөмке ұстамаған. Соның нәтижесінде көрермен назары киімнің пішіні мен матасына аударылған.
Dries Van Noten: өткен ғасыр сәні қайта оралды
Dries Van Noten сән үйінің дизайнері Джулиан Клауснер 1950 жылдардағы Голливуд актрисаларының күнделікті өмірінен шабыт алған.
Жаңа топтамада сәнді кешкі көйлектер қарапайым күнделікті киімдермен үйлестірілген. Інжу әшекейлер, ұзын қолғаптар мен классикалық көйлектер де кездеседі.
Топтаманың тағы бір ерекшелігі – түстердің көптігі. Дизайнер лимон түстес сары, жасыл, қызғылт, күлгін, көгілдір, маржан және шие түстерін пайдаланған.
Кейбір көйлектер мен мөлдір белдемшелерге ескі Голливуд фильмдерінің афишаларын еске түсіретін суреттер басылған.
Тіпті көрсетілімге шақыру билеті де Lacquera and Lace атты ойдан шығарылған фильмнің афишасы түрінде әзірленген.
Schiaparelli: бір жакеттен бірнеше образ
Schiaparelli сән үйінің креативті директоры Дэниел Роузберри жаңа топтамасының негізіне жакетті алған.
Бұл идея сән үйінің негізін қалаушы Эльза Скиапареллидің кешкі костюмдерінен бастау алады. Ол кезінде жакет арқылы киімнің сән-салтанатын өзгертуге мүмкіндік беретін үлгілер жасаған.
Роузберри осы тәсілді қазіргі сәнге бейімдеген. Топтамада Schiap jacket деп аталатын жакеттің сегіз нұсқасы ұсынылған. Олардың арасында барқыттан, атластан тігілген және сәндік бөлшектермен безендірілген үлгілер бар.
Басты ерекшелік – киімдерді өзара алмастырып кию мүмкіндігі. Жакет, белдемше, шалбар мен топтарды әртүрлі үйлестіріп, бірнеше образ жасауға болады.
Loewe: спорттық киімдерге сәнді сипат берілді
Loewe сән үйінің дизайнерлері Джек Маккалоу мен Лазаро Эрнандес америкалық спорттық киім үлгілерін брендтің испандық мұрасымен ұштастырған.
Топтамада поло жейделер, баскетбол формасына ұқсас киімдер, бомберлер мен жеңіл спорттық күртелер бар.
Бірақ қарапайым көрінетін киімдердің жасалу тәсілі ерекше. Мысалы, сұр свитшот толықтай моншақпен көмкерілген. Ал мақта матадан тігілгендей көрінетін жолақты жакеттер шын мәнінде жұқа өңделген былғарыдан жасалған.
Түстер де назардан тыс қалмаған. Көк, сары, жалбыз түстес жасыл және қызғылт сары реңктер кеңінен пайдаланылған.
Бұл топтама спорттық киімдерді тек жаттығуға емес, күнделікті сәнді образ жасауға да пайдалануға болатынын көрсетеді.
Celine: париждік сәннің жаңа үлгісі
Celine сән үйінің дизайнері Майкл Райдер жаңа маусымда классикалық париждік стильге өзгеше көзқарас ұсынған.
Топтамада тар шалбарлар мен кең пішілген киімдер, классикалық пальтолар мен романтикалық үлгілер қатар кездеседі.
Дизайнер қара көйлек, былғары күрте, иығы кең жакет және тренч секілді күнделікті гардеробта жиі кездесетін киімдерді пайдаланған.
Алайда олардың әрқайсысына ерекше бөлшек қосылған. Мысалы, үлкен сөмке, ұзын моншақ, бау түріндегі белдік немесе ашық түсті аксессуар қарапайым киімнің өзін өзгеше көрсетеді.
Hermès: ауадай жеңіл киімдер
Hermès сән үйінің дизайнері Надеж Ване жаңа топтамасын ауа мен еркін қозғалыс идеясынан шабыттанып жасаған.
Бұрынғы маусымдардағы қою түстердің орнына крем түстес, сары және қызғылт сары реңктер келген. Көрсетілімде жұқа былғары, торлы мата, трикотаж және жартылай мөлдір материалдар пайдаланылған.
Киімдердің ерекшелігі – олардың пішінін өзгерту мүмкіндігі. Арнайы сыдырмалар арқылы шалбардың бүйірін ашуға, көйлектің ұзындығын реттеуге және жакеттің пішінін өзгертуге болады.
Мұндай шешімдер киімді ауа райына және адамның қозғалысына қарай бейімдеуге мүмкіндік береді.
Miu Miu: спорттық киім мен сән-салтанат тоғысы
Miu Miu сән үйінің дизайнері Миучча Прада спорттық киімдерге жаңа сипат берген.
Топтамада деним, трикотаж, былғары және күнделікті киім үлгілері классикалық костюмдермен, көйлектермен және сәндік әшекейлермен үйлестірілген.
Мысалы, спорттық топтардың үстінен сәнді киімдер киілген. Ал моншақпен безендірілген бралар жемпірлер мен свитшоттардың сыртынан ұсынылған.
Кейбір джинсы, белдемше, көйлек және аяқкиім үлгілеріне айқастыра тартылатын баулар қосылған. Олардың көмегімен киімнің пішінін өзгертуге болады. Бұл топтамада спорттық және сәнді киімдердің арасындағы шекара жойыла түскен.
Jean Paul Gaultier: корсеттер мен ерекше пішіндер
Jean Paul Gaultier сән үйінің дизайнері Дюран Лантик брендтің бұрыннан танымал үлгілерін жаңаша ұсынған.
Көрсетілімде конус пішінді бюстгальтерлер, корсеттер, көлемді киімдер мен театр костюмдерін еске түсіретін баскиімдер ұсынылған.
Дизайнер адам денесінің пішіні мен киім көлеміне ерекше назар аударған.
Сонымен қатар топтамада күнделікті киюге болатын үлгілер де бар. Бірақ олардың көпшілігіне тосын бөлшектер қосылып, әдеттегі киімдерден ерекшелендірілген.
Chanel: еркіндік пен қозғалысқа басымдық
Chanel сән үйінің креативті директоры Матье Блази брендтің дәстүрлі үлгілерін сақтай отырып, оларды жеңіл әрі еркін етіп көрсеткен.
Grand Palais сарайында өткен көрсетілімде подиумның үстіне жарық шашқан құстар бейнеленген декорациялар орнатылған. Топтамада мөлдір маталар, кең пішілген киімдер, өңделмеген жиектер және дененің кей тұсын ашық қалдыратын үлгілер кездеседі.
Chanel-дің әйгілі жакеті де жаңаша ұсынылған. Кейбір модельдер оны ішінен қосымша киім кимей киген. Көрсетілім Бритни Спирстің Gimme More әнімен аяқталған.
Жаңа топтамада брендке тән ұстамды сән үлгілерінен бөлек, еркіндік пен қозғалысқа басымдық берілген.
Louis Vuitton: салмағы футболкадан да жеңіл пальто
Louis Vuitton сән үйінің креативті директоры Николя Жескьер жаңа топтамасында киімнің жеңілдігі мен ыңғайлылығына назар аударған.
Көрсетілім ұшатын көліктер бейнеленген футуристік декорациялар аясында өткен. Топтамада ақ түсті мөлдір көйлектер, жұқа трикотаж, жібек белдемшелер, кардигандар, жеңіл пальтолар мен нейлон күртелер ұсынылған.
Дизайнер маталар мен киім құрылымын өзгерту арқылы олардың салмағын азайтуға тырысқан. Бастапқы материалда кейбір пальтолардың салмағы кәдімгі футболкадан да жеңіл екені айтылады.
Жескьер бұл тәсілді «икемді эргономика» деп сипаттайды. Оның негізгі мақсаты – адамның қозғалысына кедергі келтірмейтін, денеге ыңғайлы киім жасау.
2027 жылдың көктемі мен жазында не сәнде болады?
Париж сән апталығында ұсынылған топтамаларды салыстырғанда бірнеше ортақ бағыт байқалады.
- Жеңіл және мөлдір маталар. Шифон, органза, жұқа трикотаж бен торлы материалдар көптеген топтамада кездеседі.
- Кең әрі еркін пішімдер. Дизайнерлер денені қыспайтын, қозғалысқа ыңғайлы киімдерге көңіл бөлген.
- Спорттық және классикалық киім үйлесімі. Спорттық жейделер костюмдермен, ал күнделікті киімдер кешкі сән үлгілерімен үйлестірілген.
- Ашық түстер. Сары, жасыл, көк, қызғылт сары және күлгін реңктер алдағы маусым топтамаларында жиі кездеседі.
- Пішінін өзгертуге болатын киімдер. Сыдырма, бау және алмастырылатын бөлшектер арқылы бір киімді бірнеше тәсілмен кию ұсынылған.
Париж сән апталығының басты ерекшелігі – сән үйлерінің киімнің сыртқы көрінісімен қатар оның ыңғайлылығына да мән беруі. Дизайнерлер тарихи үлгілерді жаңартып, күнделікті өмірге бейімдеуге ұмтылған.
Осылайша 2027 жылдың көктем-жаз топтамаларында еркін пішім, жеңіл материалдар мен әртүрлі стильді үйлестіру алдыңғы қатарға шықты.
