Қазақстанда мәслихат депутаттарына қатысты жаңа жаза түрлері талқыланып жатыр. Оларға сессияда дауыс беру құқығынан айыру, сессияға қатысудан шеттету, ал тұрақты негізде жұмыс істейтін депутаттар үшін бір күндік жалақысынан айыру шараларын енгізу ұсынылып отыр.
Мәжіліс депутаттары Жергілікті мемлекеттік басқару және өзін-өзі басқару туралы заңға өзгерістер мен толықтыруларды бірінші оқылымда талқылап жатыр.
Мәслихат депутаттарына бір сессия бойы дауыс беру құқығынан айыру және сессияға қатысу құқығынан шеттету түріндегі жаза қолдану ұсынылады. Тұрақты негізде жұмыс істейтін депутаттар үшін қосымша ретінде бір күндік жалақысынан айыру түріндегі тәртіптік шара қолданылуы мүмкін, – делінген құжат мәтінінде.
Мәслихат аппараты аталған шараны қолдануға қатысты мәселелерді, сондай-ақ депутаттардың мәслихат отырысы мен соған қарасты жиынға қатысуын бақылайды. Оларға қандай да бір жазалау шарасын қолдануды мәслихат төрағасы немесе тұрақты комиссия төрағасы шешеді.
Мәслихаттардың бюджетке ықпалы артады
Бұл өзгерістер жергілікті өзін-өзі басқару жүйесін кеңейтуді көздейтін ауқымды заңнамалық пакеттің бір бөлігі. Атап айтқанда, мәслихат депутаттарының бюджет мәселелеріндегі өкілетін кеңейту ұсынылған. Оларға әкімдік бюджет комиссияларының жұмысына қатысу және қажет болған жағдайда бюджетті нақтылау бастамасын көтеру құқығын беру жоспарлануда.
Сонымен қатар, құжат жергілікті қауымдастықтың рөлін күшейтуді қарастырады. Заң жобасында азаматтардың жергілікті маңызы бар мәселелерді шешуге қатысуының жаңа тетіктерін бекіту, сондай-ақ жергілікті қоғамдастық жиындары мен кеңестерінің жұмысы нақтырақ регламенттеледі. Мұндай кеңестің шешімдері мемлекеттік органдар мен жергілікті өзін-өзі басқару органдарында 15 күн ішінде қаралуы тиіс.
Заң жобасының тағы бір бөлімінде жергілікті маңызы бар мәселелер топтастырылған. Оған абаттандыру, тұрғын үй-коммуналдық шаруашылық, санитарлық жағдай, құқықбұзушылықтың алдын алу, төтенше жағдайлардың алдын алуға қатысу, мүгедектігі бар адамдарды жұмыспен қамтуға жәрдемдесу, сондай-ақ тұрмыстық зорлық-зомбылықтың алдын алу мәселесі енгізілуі мүмкін.
