Диетолог түнде ұйықтар алдында не жеуге болмайтынын айтты
Мөлдір Қайнар тілші
Танымал британдық диетолог Кайл Кроули түнгі уақытта қышқыл жемістер мен көкөністерді тұтынудың ұйқы сапасына кері әсер ететіні жөнінде ескертті, деп хабарлайды El.kz ақпарат агенттігі.
Оның зерттеулеріне сүйенсек, мұндай өнімдерді ұйықтар алдында жеу қалыпты ұйқы тәртібін бұзып, ұзақ мерзімді денсаулық мәселелеріне алып келуі мүмкін. Бұл туралы Daily Mail басылымы жазды.
Маманның айтуынша, құрамында қышқылы мол өнімдер өңеш пен асқазан арасындағы төменгі сфинктерге босаңсытатын әсер етеді. Нәтижесінде, асқазан сөлінің өңешке қайта оралуы – яғни қышқыл рефлюкс – орын алады. Бұл жағымсыз сезімдер тудырып, ұйқыны бұзады. Кроули әсіресе апельсин, қызанақ пен грейпфрут секілді өнімдерді ұйықтар алдында тұтынбауға кеңес береді, өйткені олар кекіру мен күйдіргіштік сезімін тудырып, тыныш ұйықтауға кедергі келтіреді.
Сондай-ақ, диетолог кешкі ас мәзірінен майлы тағамдарды толықтай алып тастауды ұсынады. Мұндай тағамдар ас қорыту процесін баяулатып, асқазанда ауырлық сезімін туғызып, қышқыл рефлюксті күшейтеді, бұл өз кезегінде ұйқы сапасын нашарлатады. Маманның айтуынша, төсекке жатар алдында тығыз тамақтану мүлдем ұсынылмайды. Ағзаға астың қорытылуы үшін уақыт қажет, ал тамақ ішкен бойда ұйықтау — бұл процесті бұзып, денсаулыққа зиян тигізуі мүмкін.
Алайда егер ұйықтар алдында аштық сезімі мазаласа, Кроули жеңіл, асқорыту жүйесіне салмақ түсірмейтін тіскебасарларды таңдауға кеңес береді. Диетологтың пікірінше, жаңғақтар мен сүт өнімдері — аштықты басып, асқазанды шамадан тыс жүктемей, тыныш ұйқыға ықпал ететін ең тиімді таңдау болып табылады.
Қысқа да нұсқа. Жазылыңыз telegram - ға
Оқи отырыңыз 
