Жыл басынан бері 43 млн теңгеден астам жалған банкнот тәркіленді

Қаржылық мониторинг агенттігі жалған шетел валютасын өткізу фактілерінің жиілеп кеткені жайлы хабарлайды, деп хабарлайды El.kz ақпарат агенттігі.

Сондай топтардың бірі Алматы қаласында ұсталған, олар жалған 100 долларлық купюраларды сатумен айналысқан.

Қылмысқа қатысушылардың бірінің тұрғылықты жерін тінту барысында 149 дана (14 900 АҚШ доллары) жалған доллар табылды.

Құқық бұзушылар ұсталып, сот оларға қамауда ұстау түріндегі бұлтартпау шарасын санкциялады, - делінген мәліметте.

Сонымен қатар Батыс Қазақстан облысында ҚМА полициямен бірлесіп жалған валютаны өткізу фактісі анықтады.

Бір топ адам Орал қаласындағы лотерея клубтарының бірінде жалған 25 000 АҚШ долларымен 10 000 еуро өткізген деген күдікке ілікті.

Күдіктілер бәс тігу мақсатында бұл қаражатпен шоттарын толықтырған.

Жалған ақшаны сатушыға қатысты соттың санкциясымен «қамауда ұстау» түріндегі бұлтартпау шарасы таңдалды, - деп қосты ҚМА баспасөз қызметі.

Жыл басынан бері Қазақстан аумағында айналымнан 1 060 жалған банкнот тәркіленді, оның ішінде ұлттық валютада 647 000 теңге сомасына 141 дана, 90 400 АҚШ долларына 905 купюра, 2 000 еуроға 4 купюра, 1 000 юань сомасына 10 купюра.

Алынған жалған банкноттардың жалпы сомасы 43 млн теңгеден асады.

Жалпы, ағымдағы жылы жалған купюраларды жасап, өткізгені үшін 8 адам 5 жылдан 6 жылға дейінгі мерзімге бас бостандығынан айырылды.