Жүргізуші куәлігін алу үшін кезек алты айға дейін созылуы мүмкін

Қазақстанда жүргізуші куәлігін алу үшін емтихан тапсыруға байланысты ұзын-сонар кезек мәселесі көтерілді. «Ақ жол» фракциясының депутаттары теориялық және практикалық емтихандардың қолжетімділігін арттырып, азаматтардың бірнеше ай күтуіне жол бермеуді ұсынды.

Емтиханға кезек 6 айға дейін созылады

Депутаттардың айтуынша, азаматтар мен автомектептерден арнайы халыққа қызмет көрсету орталықтарында жүргізуші куәлігін алу емтихандарына қатысты шағымдар түсіп жатыр.

Атап айтқанда, емтихан тапсыру үшін күту мерзімі кей жағдайда алты айға дейін созылуы мүмкін. Бос орындар ашылған сәтте тез таусылады.

Депутаттар жазылу жүйесінің ашықтығына да қатысты мәселе көтерген. Олардың пікірінше, орындардың кімге және қандай тәртіппен берілетіні азаматтарға түсінікті болуы керек.

Тапшылық пен ашықтық жоқ жерде ақылы делдалдар пайда болмай қоймайды, – делінген депутаттық сауалда.

«Ақ жол» фракциясы мәселені тек қолданыстағы инфрақұрылымды пайдалану арқылы шешу жеткіліксіз деп санайды. Депутаттар емтихан қабылдайтын орындардың санын көбейтіп, мемлекеттік органдармен қатар жеке сектордың мүмкіндігін пайдалануды ұсынды.

ХҚКО жұмыс уақытын ұзарту ұсынылды

Депутаттардың бірінші ұсынысы теориялық емтиханға кезекті қысқартуға бағытталған. Олар мамандандырылған ХҚКО-лардың жұмыс уақытын азаматтарға ыңғайлы болу үшін сағат 20:00-ге дейін ұзарту мүмкіндігін қарастыруды ұсынды.

Сонымен қатар емтихан қабылдаушылардың ауысымдық жұмысын ұйымдастыру мәселесін қарау ұсынылды.

Депутаттар теориялық емтихан қабылдау үшін қосымша алаңдар ашу мүмкіндігін де атап өтті. Атап айтқанда, Ұлттық тестілеу орталығы мен Мемлекеттік қызмет істері агенттігінің аумақтық бөлімшелерінің базасын пайдалану ұсынылып отыр.

Олардың пікірінше, бұл емтихан тапсыруға арналған орындардың санын көбейтіп, қолданыстағы орталықтарға түсетін жүктемені азайтуға мүмкіндік береді.

Астанада бір ғана автодром бар

Депутаттар үшін ең өзекті мәселенің бірі – практикалық емтиханға кезек. Қазіргі уақытта практикалық емтихан негізінен мамандандырылған ХҚКО-лардың автодромдарында қабылданады.

Сауалда халық саны агломерацияны қоса алғанда шамамен 2 миллионға жететін Астанада бір ғана автодромның болуы мәселенің ауқымын көрсететіні айтылған.

Осыған байланысты депутаттар жеке сектордың инфрақұрылымын пайдалануды ұсынды.

Көптеген автомектептердің жеке автодромдары бар. Сондықтан бірыңғай техникалық, қауіпсіздік және ұйымдастырушылық талаптарды белгілеп, сол талаптарға сәйкес келетін жеке автодромдарды аккредиттеу арқылы емтихан қабылдауға тарту ұсынылды.

Жеке автодромдар емтихан қабылдауы мүмкін

Депутаттардың ұсынысы бойынша, жеке автодромдар белгіленген талаптарға сай болған жағдайда практикалық емтихан қабылдауға мүмкіндік алуы мүмкін. Бұл ретте барлық емтихан қабылдау орындары үшін талаптар бірдей болуы тиіс.

Атап айтқанда, емтихан өткізу тәртібі, бағалау критерийлері, бейнебақылау жүйесі және емтихан нәтижелерін ақпараттық жүйеге енгізу талаптары бірыңғай болуы қажет.

Депутаттар мұндай тәсілді теориялық емтиханға да қолдануды ұсынды. Тиісті талаптарға жауап беретін жеке ұйымдарды аккредиттеу арқылы емтихан қабылдайтын орындар санын арттыруға болады деп есептейді.

Делдалдарға жол бермеу ұсынылды

«Ақ жол» фракциясы емтиханға жазылу кезінде делдалдардың қызметін болдырмау мәселесіне де назар аударды. Депутаттар емтиханға жазылуды тек eGov және eGov Mobile арқылы жүзеге асыруды ұсынды.

Сонымен бірге бос орындарды автоматты түрде бөлудің ашық әрі қорғалған механизмін енгізу қажеттігі айтылды.

Депутаттардың пікірінше, мұндай жүйе кезекті алдын ала иеленіп алып, кейін азаматтарға ақылы түрде ұсынатын делдалдардың әрекетін шектеуге мүмкіндік береді.

Депутаттар үш негізгі ұсыныс айтты

«Ақ жол» фракциясы Үкіметке үш бағыт бойынша шара қабылдау мүмкіндігін қарастыруды ұсынды:

• мамандандырылған ХҚКО-лардың жұмыс уақытын сағат 20:00-ге дейін ұзарту және емтихан қабылдаушылардың ауысымдық жұмысын ұйымдастыру;
• теориялық және практикалық емтихан қабылдау орындарын көбейту, мемлекеттік ұйымдардың базасын пайдалану және талапқа сай жеке автодромдарды аккредиттеу;
• емтиханға жазылуды eGov пен eGov Mobile арқылы жүргізіп, ақылы делдалдарға жол бермейтін ашық жүйе енгізу.

Депутаттар бұл шаралар емтихан тапсыру мүмкіндігін арттырып, азаматтардың кезекте ұзақ уақыт күту мәселесін азайтуға бағытталғанын атап өтті.

Депутаттық сауал Премьер-Министрдің орынбасары – Жасанды интеллект және цифрлық даму министрі Жасұлан Мәдиевке және Ішкі істер министрі Ержан Саденовке жолданды.