Жұмысшылардың құқықтарын қорғауға ықпал ететін заң мақұлданды

Сенат Спикері Мәулен Әшімбаевтың төрағалығымен өткен Палата отырысында депутаттар еңбек даулары мен жанжалдарын шешу тәртібін оңайлату мәселелері туралы заңды қарап, қабылдады, деп хабарлайды El.kz Сенаттың баспасөз қызметіне сілтеме жасап.

Сенат төрағасы өз сөзінде бұл құжаттың еңбек дауларын реттеу және келіссөздер процестерін ұйымдастыру мәселелері бойынша заңнаманы жетілдіру үшін әзірленгенін атап өтті.

Мемлекет басшысы еңбек дауларына қатысты құқықтық қатынастарды қосымша реттеу мәселесін бірнеше рет көтергені белгілі.

Соған сәйкес әзірленген бұл заң осы саладағы отандық заңнаманы жетілдіруді көздейді. Жалпы, дауларды реттеудің баламалы тәсілдерін қолдану – құқықтық саясатты дамытудың маңызды бағыттарының бірі. Осы заң арқылы жеке және ұжымдық еңбек дауларын қарау тәртібі қайта қаралады. Сондай-ақ келісу және татуластыру комиссиясының мәртебесі күшейе түседі. Алдағы уақытта жаңа нормалар жұмысшылардың құқықтарын қосымша қорғауға және еңбек дауларын азайтуға ықпал етеді деп сенеміз, – деді Сенат төрағасы.