Жолда қалып қойған тұрғындарды үйінде қонақ еткен полицей алғысқа бөленді

Семейде учаскелік полицей бірнеше тұрғынның алғысына бөленді. Тәртіп сақшысы боранды күні жолда қалып қойған азаматтарға көмекке келген, деп хабарлайды El.kz ақпарат агенттігі.

Полиция мәліметінше, Қасқабұлақ ауылдық округінің  жанында “Камаз” жүк көлігі жүруге ешқандай мүмкіндігі болмай, жолда тұрып қалған. Оларға учаскелік полиция инспекторы, полиция лейтенанты Ермек Құрманғажин дереу көмекке келген.

Автокөлік қауіпсіз жерге қойылып, тәртіп сақшысы жолда қалған Семей қаласының 5 тұрғынын өзінің үйінде қонақ еткен. Олар тәртіп сақшысының үйінде бір күн түнепті. Кейін жол ашылған соң полицей тұрғындарды қайта жолға шығарып салуға көмектескен.

Еске салсақ, бұған дейін Абай облысының Көкпекті ауданында автомобиль жолдарының жабылуына және шектеулердің енгізілуіне байланысты автомобильдер кептелісі пайда болған болатын. Соның салдарынан жалпы саны 100 жеңіл көлік, 15 жүк көлігі және 1 автобус қар құрсауында қалған еді. Күні кеше, 17 ақпанда ауа райының қолайсыздығына байланысты Абай облысында төтенше жағдай режимі енгізілді. Облыстық Төтенше жағдайлар департаментінің мәліметінше, өңірде қалыңдығы 80 метрге дейін қар түскен. 

Оқи отырыңыз: 

• ТЖМ аяз бен дауыл кезінде не істеу керектігін айтты
• Қордайда қарлы боран кезінде 18 адам құтқарылды