Жетісуда 600-ге жуық әйел жатыр мойны обырымен есепте тұр

Жетісу облысында адам папиломма вирусына қарсы екпе жалғасуда, деп хабарлайды El.kz ақпарат агенттігі. 

Жатыр мойны обырынан әйел адамдардың қайтыс болу дерегі жыл сайын көбейгеніне байланысты биыл адам папиломмасы вирусына қарсы екпе ұлттық күнтізбеге енгізілген болатын. Қыркүйек айынан басталған вакцинация әлі күнге дейін жалғасып жатыр. Бұл туралы Өңірлік коммуникациялар қызметінің баспасөз конференциясында облыстың санитарлық-эпидемиологиялық бақылау департаменті басшысының орынбасары Индира Күнбасова және онкогинеколог дәрігер Қуаныш Ергембеков айтты.

Дүниежүзілік денсаулық сақтау ұйымының мәліметі бойынша, жатыр мойны обырларының 95%-ы АПВ-дан туындайды. Бұл аурудың алдын алудың тиімді әдісі - вакцинация. Вирусқа қарсы «Гардасил» вакцинасы 15 жылдан астам уақыт бойы пайдаланылып келеді. Ол Өзбекстан, Қырғызстан, Түркіменстанды қоса есептегенде 135 елдің ұлттық иммундау бағдарламаларына енгізілген.

Бүгінде Жетісу облысына вакцинаның 12 мың дозасы әкелінген. Ол қыз балаларға екі кезең арқылы салынады. Қазіргі уақытта 3880 қыз балаға екпе салынған. Вакцинациядан кейін жағымсыз әсерлер тіркелмеген.

Айта кетейік, Жетісу облысында 600-ге жуық әйел адам жатыр мойны обырымен есепте тұр. Оның ең жасы - 24 жаста.