Жер сілкінісі: үйінділер астында қалған ер адам 100 сағаттан соң құтқарылды

Жойқын жер сілкісінінен соң арада бес күн өткенде Мьянмадағы қонақүйдің үйінділер астынан ер адам шығарылды, деп хабарлайды El.kz ақпарат агенттігі.

26 жастағы ер адам ел астанасы Нейпьидодағы ғимараттың қирандыларының арасынан табылды. Оны Мьянма мен Түркияның құтқарушылар тобы түн ортасында анықтаған.

Кадрдан құтқарушылардың үйінді аршып, ер адамды жер бетіне алып шығып жатқанын байқауға болады. Ол 7,7 балдық жер сілкінісінен бес күн өткенде яғни, 100 сағаттан аса уақыттан соң құтқарылып отыр.

Зілзала салдарынан 2700-ден астам адам қаза тапты, жергілікті билік көз жұмғандар саны 3 мыңнан асады деп болжап отыр.

Жер сілкінісінің эпицентріне жақын орналасқан Мандалай мен Сагайн қалаларында аман қалғандар көшеде түнеуге мәжбүр. Қираған ғимараттардың астында қалған мәйіттердің жағымсыз иісі бүкіл апат аймағына таралуда. Су, азық-түлік және дәрі-дәрмек жетіспеушілігі байқалуда, ал мамыр айында муссондық жаңбыр басталуы мүмкін.