Жасөспірімдерге құмар ойындар мен есірткі заттарының зияны түсіндірілді

Түркістан облысы Арыс ауданы прокуратурасының ұйымдастыруымен кәмелетке толмағандар арасындағы құқық бұзушылықтардың алдын алу мақсатында оқушылар мен олардың ата-аналармен кездесу ұйымдастырылды. Бұл туралы El.kz ақпараттық агенттігі хабарлайды.

Кездесу барысында жасөспірімдерге жасалған құқық бұзушылықтар бойынша көзделген жауапкершіліктер, құмар ойындар мен есірткі заттарының зияны әрі салдары түсіндірілді.

Құқық қорғау органының негізгі қызметі - кәмелетке толмағандардың арасындағы құқық бұзушылықтың алдын алу және болдырмау, құқықтық сауаттылықты арттыру, заңсыз іс-әректтер жасаудан қорғау, жастарға  заңға бағынушы азамат ретінде құқықтық тәлім-тәрбие беру.

Бүгінде өрімдей жастардың қылмыс жасауын үйреншікті көрініске айналдыруға болмайды.

Қылмысқа бейім бала есейген сайын қылмыстың ауыр түрлерін жасауға бейімделетінін ескерсек, бұл - аса өткір мәселе.

Сол себепті бұл індеттің өзектілігі мен арты қандай жамандыққа алып келетіні айтылып, ата-аналар балаларының әлеуметтік желілерге кіруіне, мінезіндегі өзгерістерге ерекше мән беру ескертілді.

Осы орайда ата-аналарға бала тәрбиесіне асқан жауапкершілікпен қарап, салауатты өмір салтын ұстанудың маңыздылығын түсіндірген маңызды.

Аталмыш бағыттағы іс-шаралар аудан аумағындағы білім беру ұйымдарында апта сайын ұйымдастырылуда.