Жасанды интеллект арқылы жасалған контентті таңбалау міндеттелді

Қазақстанда «Жасанды интеллект туралы» заңның бірқатар нормалары күшіне енді. Атап айтқанда, енді жасанды интеллект көмегімен жасалған немесе өзгертілген контентті арнайы таңбалау міндетті болып отыр.

Заңның 21-бабына сәйкес, жасанды интеллект арқылы жасалған немесе өңделген әрі шынайы оқиғаларды имитациялайтын суреттер, бейнематериалдар, аудиожазбалар және мәтіндер аудиторияға арнайы ескерту мен таңбалау болған жағдайда ғана таратыла алады.

Мұндай талаптардың енгізілуі жасанды интеллект саласындағы негізгі қағидаттарға – ашықтық пен жауапкершілікке негізделген. Заң нормаларына сәйкес:

• жасанды интеллектті пайдалану адамдарды адастыруға немесе шындықты қабылдауды бұрмалауға жол бермеуі тиіс;
• адамның әл-ауқаты мен еркін шешім қабылдау құқығы басымдыққа ие;
• қоғамда жалған ақпараттың таралу қаупін азайту көзделеді.

Жалған ақпаратқа қарсы іс-қимыл орталығының мәліметінше, таңбаланбаған жасанды интеллект контенті, әсіресе қоғамдық маңызы бар және әлеуметтік тұрғыдан сезімтал тақырыптарда, манипуляция, фейк ақпарат және дипфейк технологияларының кең таралуына жол ашуы мүмкін.

Осыған байланысты орталық бұқаралық ақпарат құралдарының өкілдерін, блогерлерді және цифрлық платформалар әкімшілерін генеративті жасанды интеллект технологияларын қолдану кезінде жауапкершілік пен ашықтық қағидаттарын қатаң сақтауға шақырады.