Жапонияда әлемдегі алғашқы иенге байланған стейблкоин іске қосылды

Жапонияда ұлттық валюта – иенге толықтай байланған әлемдегі алғашқы стейблкоин ресми түрде айналымға енгізілді. Бұл туралы Reuters агенттігіне сілтеме жасай отырып El.kz интернет порталы хабарлайды.

Мақалада атап өтілгендей, стейблкоин шығаруды JPYC Inc. компаниясы бастаған. Цифрлық валюта ішкі резервтер мен Жапонияның мемлекеттік облигацияларының қамтамасыз етуімен қолдау тапқан.

Стартаптың жоспары бойынша, алдағы үш жыл ішінде 10 триллион иенге (шамамен 66 миллиард доллар) дейін цифрлық активтер айналымға шығарылады.

Пайдаланушылар бұл стейблкоиндерді комиссиясыз аударып, ал компания инвестицияланған қаражаттан пайыздық табыс табуды көздейді.

Жапония банкінің бұрынғы басшысы Томоюки Симоданың пікірінше, иенге байланған стейблкоиндердің кеңінен таралуы уақыт алады, әрі олар долларға бекітілген активтермен бәсекелесе алмайды.

Ал Жапония банкі төрағасының орынбасары Рёдзо Химино стейблкоиндердің жаһандық төлем жүйесіне ықпал етіп, дәстүрлі банктік депозиттердің орнын ішінара басуы мүмкін екенін атап өтті.

Халықаралық есеп айырысу банкінің дерегінше, бүгінде әлемдік нарықтағы стейблкоиндардың 99 пайыздан астамы долларға байланған, ал глобалды стейблкоин нарығының көлемі шамамен 247 миллиард долларды құрайды.