Жаңа Mercedes-AMG CLA 45 несімен ерекшеленеді

Автомобиль индустриясы электрлендіру дәуіріне аяқ басқан сайын өндірушілердің алдында күрделі мәселе туындады. Атап айтқанда жоғары өнімділікті сақтай отырып, жүргізушіге эмоция сыйлайтын дәстүрлі спорткардың мінезін қалай жоғалтпау керек? Жаңа электрлі Mercedes-AMG CLA 45 дәл осы сұраққа жауап іздеген модельдердің бірі саналады. Неміс инженерлері бұл жолы тек қуатты электр көлігін ғана емес, бензинді AMG үлгілерінің эмоциясын цифрлық технологиялар арқылы қайта жаңғыртуға тырысқан.

Электрлі көлік енді «тірі» сезіледі

Mercedes-AMG жаңа CLA 45-тің басты ерекшелігі – жүргізушінің сезіміне әсер ететін технологияларға басымдық берілуі. Электр қозғалтқышының табиғатына тән үнсіздік бұл модельде әдейі өзгертілген.

Инженерлер Mercedes-AMG A 45 S моделінің төрт цилиндрлі қозғалтқышының дыбысын арнайы жазып алып, оны цифрлық форматта қайта жасаған. Жүйе көліктің жылдамдығына, жүктемесіне және үдеуіне қарай қозғалтқыш үнін нақты уақыт режимінде өзгертіп отырады. Бұған қоса, орындықтардың дірілі, виртуалды беріліс ауыстыру және тахометрдің жұмысы дәстүрлі бензинді спорткардың әсерін береді.

Бұл – автомобиль өндірісіндегі жаңа үрдіс. Бұрын инженерлер іштен жанатын қозғалтқыштың дыбысынан арылуға ұмтылса, енді электрлі көліктерге сол эмоцияны қайта енгізуге тырысуда.

Ақылды аэродинамика тиімділікті арттырады

Жаңа CLA 45 тағы бір маңызды жаңалық – белсенді аэродинамика жүйесімен жабдықталған.

Белгілі бір жылдамдыққа жеткенде артқы спойлер автоматты түрде көтеріліп, көліктің жолға жабысуын жақсартады. Ал спорттық режимдерде бұл элементтер жүргізушінің әрекетін күтпей-ақ жұмысқа қосылады. Жүйе жылдамдықты ғана емес, үдеу мен басқа аэродинамикалық бөлшектердің жұмысын да ескереді.

Мұндай технологиялар бұған дейін негізінен суперкарларда қолданылса, енді олар спорттық седандар сегментіне де ене бастады.

Жасанды интеллект жүргізушіге көмектеседі

Mercedes-AMG CLA 45-тің ең қызықты шешімдерінің бірі – Predictive Performance Management (PPM) жүйесі. Көпшілік электр көліктері барынша жоғары қуатты үнемі қолжетімді етсе, жаңа AMG басқаша жұмыс істейді. Жасанды интеллект трассаның ерекшелігін, аккумулятордың қуатын және жүргізу стилін талдап, қай жерде толық қуатты пайдалану қажет екенін өзі анықтайды.

Нәтижесінде көлік бір айналымда өте жылдам болып қана қоймай, бүкіл жарыс барысында тұрақты нәтижені сақтай алады. Бұл әсіресе трекке арналған автомобильдер үшін маңызды шешім саналады.

Автомобиль ғана емес, жеке жаттықтырушы

Mercedes жүргізушіні үйретуге арналған технологияларға да ерекше назар аударған. AMG Track Pace жүйесі секундына ондаған рет телеметриялық мәліметтерді тіркейді. Жылдамдық, тежелу, бұрылыс бұрышы, дөңгелекке түсетін жүктеме, секторлардағы уақыт – барлығы жазылып отырады.

Кіріктірілген толықтырылған шынайылық (Augmented Reality) жүйесі жүргізушіге дұрыс траекторияны, тежейтін нүктелерді және бұрылыс радиустарын көрсетеді. Ал бейнетіркеуіштер телеметриямен бірге HD-бейне жазып, кейін жүргізуші өз қателіктерін жан-жақты талдай алады.

Бұл технологиялар бұрын кәсіби автоспортта ғана қолданылса, енді сериялық автомобильдердің құрамына еніп отыр.

Электр көліктер дәуірінде бағдарламалық жасақтама автомобильдің негізгі артықшылығына айналып келеді. Mercedes-AMG CLA 45-те жүргізуші электромоторлардың қуатын, энергияның осьтер бойынша бөлінуін, шиналардың температурасын, аккумулятордың күйін және дыбыстық сүйемелдеуді смартфондағы қосымша арқылы басқара алады.

Бұл қазіргі автомобильдердің механикалық өнімнен цифрлық платформаға айналып бара жатқанын көрсетеді. Болашақта мұндай мүмкіндіктердің бір бөлігі қашықтан жаңартулар арқылы толықтырылуы да ықтимал.

Қуаты суперкарлармен тең

Технологиялық жаңалықтардың бәрі жоғары өнімділікпен толықтырылған. Үш электр қозғалтқышынан тұратын күштік қондырғы 671 ат күшін өндіреді. Седан 100 км/сағ жылдамдыққа небәрі 3 секундта жетсе, Shooting Brake нұсқасына 3,2 секунд қажет.

Максималды жылдамдық стандартты нұсқада 249 км/сағ болса, AMG Dynamic Plus пакетімен бұл көрсеткіш 270 км/сағ-қа дейін артады. Бір қуаттаумен седан 669 шақырымға дейін, ал универсал шамамен 640 шақырым жүре алады.

Жаңа Mercedes-AMG CLA 45 – жай ғана электрлі спорткар емес. Бұл модель автомобиль индустриясының жаңа бағытын көрсетеді. Егер бұрын өнімділік қозғалтқыштың көлемі мен цилиндр саны арқылы өлшенсе, енді басты рөлді бағдарламалық қамтамасыз ету, жасанды интеллект, цифрлық акустика және интеллектуалды басқару жүйелері атқарады.

Mercedes-AMG дәл осы модель арқылы электрлі көліктердің тек экологиялық таза ғана емес, эмоцияға толы, жүргізушімен «сөйлесе» алатын әрі кәсіби тректе өзін дәлелдей алатын спорттық автомобиль бола алатынын көрсетуге тырысты. Бұл – AMG бренді үшін ғана емес, бүкіл премиум электр көліктер сегменті үшін жаңа кезеңнің басталғанын аңғартатын маңызды модель.