Жамбыл облысында мектеп оқушысын өлтірген екі жасөспірімге сот үкімі шықты

Жамбыл облысында екі жасөспірім мектеп оқушысын өлтіргені үшін сотталды, деп хабарлайды El.kz ақпарат агенттігі.

Жамбыл облыстық сотының баспасөз қызметінің мәліметінше, кәмелетке толмаған екі жасөспірім мектеп оқушысын өлтіргені үшін ұзақ мерзімге бас бостандығынан айырылған. Сот үкіміне сәйкес, басты айыпталушы Б.-ға қылмыстық әрекеттердің бастамашысы ретінде 11 жыл бас бостандығынан айыру жазасы тағайындалды. Ал екінші айыпталушы С. 9 жылға сотталды.

Тергеу материалдарына сүйенсек, оқиға 2024 жылдың мамыр айында Меркі ауданында болған. Жасөспірімдер арасында туындаған жанжал барысында олардың бірі екіншісінің нұсқауымен жәбірленушінің басынан металл кастетпен соққы жасап, қашып кеткен. Ауыр жарақат алған оқушы оқиға орнында көз жұмды.

Сотталғандар кінәсін ішінара мойындады. Сонымен қатар, сот олардың заңды өкілдерін жәбірленуші тарапқа 10 миллион теңге көлемінде моральдық өтемақы төлеуге міндеттеді.