Жамбыл облысында фельдшерді атып кетті

Жамбыл облысының Байзақ ауылында дефибрилляторды қолдануға қатысты пікірталас фельдшердің кеудесіне травматикалық тапаншамен оқ атумен аяқталды, деп жазады El.kz интернер порталы.

Оқиға ауыл тұрғындары – 25 жастағы А.Т. мен 24 жастағы Д.М. арасында басталған. Олар «Дефибрилляторды сау адамға қолданса не болады?» деген тақырыпта қызу пікірталасқа түскен.

Шешімін табу үшін олар таныс фельдшер, жедел жәрдем қызметінде жұмыс істейтін Ж.Б.-ға жүгінген.

Медициналық қызметкер сау адамның жүрек ырғағы қалыпты болса, оған дефибриллятор қолдану өлімге әкелуі мүмкін екенін түсіндірген. Алайда Д.М. бұл пікірге сенбей, тәжірибе жасауды талап еткен.

Келіспеушілік бірден жанжалға ұласқан. Сол сәтте Д.М. жанындағы травматикалық қарумен фельдшердің кеудесіне оқ атып, оқиға орнынан қашып кеткен.

Жарақат алған Ж.Б. сол жақ қабырға астынан жараланып, Байзақ аудандық ауруханасына жеткізілді. Дәрігерлер оның жағдайын тұрақты деп бағалауда.

Ал шабуыл жасаған күдікті Д.М. іздеуде.