«Wi-fi-ға қосылыңыздар»: Мәдиев интернет сапасына қатысты пікір білдірді

Цифрлық даму, инновациялар және аэроғарыш өнеркәсібі министрі Жаслан Мәдиев Сенат кулуарында мобильдік байланыс операторларының өсіп жатқан тарифі мен интернет сапасына қатысты жауап берді, деп хабарлайды El.kz ақпарат агенттігі.

Мәдиевтің сөзінше, оның ведомствосы байланыс сапасын арттыру жолында тынымсыз жұмыс істеп жатыр. Тілшілер министрден интернет сапасының неліктен нашар екенін сұрады.

Сіздер ауыр трафик қолданатын шығарсыздар. Wi-fi бар жерде Wi-fi-ға қосылуға кеңес беремін. Өзім де сөйтемін. Үкімет талаптарды күшейтіп жатыр. Қазір секундына мГбт көлемін арттырып жатырмыз. Қазір 5G-ді 50 мегабитке жеткізуді көздеп отырмыз, - деді министр.

Ал тұрақты түрде өсіп жатқан тарифтер құнына қатысты былай деп жауап берді:

Біздегі бағалар Кәсіпкерлік кодексі бойынша реттелмейді. Бұлай тыйым салуға болмайды. Әйтпесе олар инвестицияны қалай жасайды?! Заман дамып жатыр, әр биік ғимарат интернеттегі ақ жолақтарға әсер етеді, - деп пікір білдірді Мәдиев.