Волейболдан жазғы Қазақстан чемпионаты өз мәресіне жетті

Шығыс Қазақстанда 2009-2010 жылдары туған қыздар құрама командалары арасында жазғы Қазақстан чемпионаты өз мәресіне жетті, деп хабарлайды El.kz интернет порталы.

Жарысқа еліміздің әр өңірінен барлығы 12 құрама қатысты. Финалға Шығыс және Солтүстік Қазақстан облыстары шықты. Ақтық сында өңірлік команда жеңімпаз атанды.

Спорттық шара барысында ШҚО әкімі Нұрымбет Сақтағанов бұл чемпионат еліміздің және өңірдің жас спортшылар үшін  маңызды іс-шара екенін атап өтті.

Волейбол - бұл жай ойын емес, бұл командалық рух және жеңіске деген құштарлық! Бүгін біз қызықты және шиеленісті ойындардың куәсі болдық,  - деді аймақ басшысы.

Өңір әкімі ШҚО жеңімпаздарын, сондай - ақ екінші және үшінші орын алған СҚО мен Астанадан келген жүлдегерлерді марапаттап, спортшыларға болашақта халықаралық ареналарда ел намысын лайықты қорғауды тіледі.

Айта кетейік, Азия чемпионатына қатысу үшін ойыншылар арасында іріктеу ұйымдастырылып, үздіктері Қазақстан құрама командасының сапына кіреді. Ол іс-шара қыркүйек айында өтеді.