«Ұйқы тәртібі»: ерте тұрудың пайдасы туралы не білеміз

Адам өмір салты мен денсаулығына әсер ететін басты әдеттердің бірі – ұйқы тәртібі. Ерте тұру тек уақытты тиімді пайдалануға ғана емес, жалпы ағзаның дұрыс жұмыс істеуіне ықпал етеді. Таңертең ерте оянған адам күнін жоспарлауға, маңызды істерді асықпай орындауға мүмкіндік алады. Бұл – табысты өмір салтының бір белгісі. El.kz интернет порталының тілшісі пайдалы кеңесті назарларыңызға ұсынады. 

Ғалымдардың зерттеуі бойынша, ерте тұрған адамдардың ойлау қабілеті мен жұмыс өнімділігі жоғарырақ болады. Мәселен, Гарвард университетінің зерттеушілері «таңертеңгілік хронотипке» жататын адамдардың оқу үлгерімі мен кәсіби жетістіктері кеш ұйықтап, кеш оянатындарға қарағанда жоғары болатынын анықтаған. Бұл ми қызметінің белсенділігі мен концентрацияның таңғы уақытта күшейетінімен байланысты.

Сонымен қатар, ерте тұру ағзаның ішкі биологиялық ырғақтарын реттейді. Күннің алғашқы сәулесі организмге серотонин мен кортизол секілді гормондардың бөлінуін арттырады. Олар адамға сергектік пен күш-қуат береді. Керісінше, ұйқыны созу – жалқаулыққа, күйзеліске бейімділікті арттыруы мүмкін.

Ерте тұрудың тағы бір артықшылығы – денсаулыққа пайдасы. Таңертеңгі серуен немесе жеңіл жаттығу қан айналымын жақсартып, жүрек пен жүйке жүйесін нығайтады. Сондай-ақ дұрыс таңғы ас ішуге уақыт қалады, бұл ас қорытуға және энергияның тұрақты болуына әсер етеді.

Демек, ерте тұру – уақытты үнемдеу ғана емес, денсаулық пен табыстың кепілі. Күн сайынғы қарапайым әдет өмір сапасын жақсартуға, мақсаттарға тезірек жетуге көмектеседі.