Ұшақ апатынан «ҚазМұнайГаз» компаниясының екі қызметкері қайтыс болды

Олар компанияның еншілес және мердігер ұйымында қызмет еткен, деп хабарлайды El.kz ақпарат агенттігі.

«ҚазМұнайГаз» ҰК АҚ ұжымы Ақтау қаласындағы ұшақ апатынан қаза тапқан марқұмдардың отбасылары мен туған-туыстарына орны толмас ауыр қайғыға ортақтасып, көңіл айтады. «Azerbaijan Airlines» әуе компаниясының апатқа ұшыраған ұшағында қаза болған жолаушылардың арасында біздің әріптестеріміз де бар екенін күйзеліспен хабарлаймыз, - делінген компания мәліметінде.

Жұмагұлов Бауыржан Жұмабайұлы, «Өзенмұнайсервис» ЖШС жұмысшысы, 4-ші дәрежелі бұрғышының көмекшісі. Бауыржан компанияда 2018 жылдан бері еңбек еткен, өзін адал және білікті маман ретінде көрсетті. «Өзенмұнайсервис» ЖШС — ҚМГ-ның еншілес мекемесі.

Төлесінов Сәндібек Екібайұлы, «МұнайФилдСервис» ЖШС механикалық-энергетикалық бөлімнің инженері. Сәндібек салада 16 жыл еңбек еткен. «МұнайФилдСервис» ЖШС — «Өзенмұнайгаз» АҚ-ның мердігер ұйымы.

Көлік министрлігінің мәліметінше, апатқа ұшыраған әуе кемесінің бортында 37 Әзербайжан, 6 Қазақстан, 3 Қырғызстан, 16 Ресей азаматы болған.