Ұшақ апатынан қайтыс болған жолаушылардың туыстарына қолдау көрсетілуде

Ақтау маңындағы ұшақ апатынан қаза тапқан және зардап шеккен азаматтардың туыстарына Маңғыстау облысы барлық қажетті қолдау көрсетуде, деп хабарлайды El.kz ақпарат агенттігі.

Дәрігерлер, төтенше жағдай қызметкерлері, әкімдік өкілдері және волонтерлер күшейтілген режимде жұмыс істеп, туыстарын алып кетуге келген шетелдік азаматтарға әуежайда көмек көрсетіп, оларды қонақ үйлерге орналастыру және басқа да қажетті қолдау шараларын жүзеге асыруда.

Өңірлік психологтар мен дәрігерлер облыстық ауруханада қайғырып жүрген туыстардың денсаулығын тексеріп, психологиялық көмек көрсетуде. Сондай-ақ, ыстық тамақ пен шәй ұсынылып, қосымша қолдау көрсетілуде.

Ұшақ апатынан қаза болған Маңғыстау облысының үш азаматының отбасыларына қаржылай көмек көрсетіліп, марқұмдарды жерлеу рәсімдеріне қолдау білдірілді.