Ұрылар танымал актердің үйін тонап кетті

Үш қаскүнем қоршаудан асып өтіп, терезені сындырып, Голливуд актері Брэд Питтің Лос-Анджелестің беделді ауданындағы зәулім үйінен мүлік ұрлап кеткен. Полиция оқиғаны тергеп жатыр, деп хабарлайды El.kz интернет порталы.

Бұл туралы бейсенбі, 26 маусым күні, дереккөзге сілтеме жасай отырып NBC News хабарлады.

Телеарна тілшілеріне сұхбат берген дереккөздердің айтуынша, ұрлық болған кезде актер үйде болмаған. Лос-Анджелес полициясының өкілі сәрсенбі күні кешке Голливудқа жақын орналасқан Лос-Фелис ауданында ұрлық болғанын растады, бірақ үйдің иесі немесе онда кім тұратыны туралы нақтыламады.

Ресми деректерге сәйкес, белгісіз адамдар үйдің астан-кестеңін шығарып, құны әзірге белгісіз мүлікті алып кеткен. Полиция үш ер адамды іздестіріп жатыр.